قصائد شعبية وألغاز

قصائد شعبية

لطيف الروح

الهوى في وسط قلبي حط عله**يا جروح الحب وين القى دواها

عبرتي من فوق عيني مستهله**آه من روحي شكت قاسي هواها

انشروا له قصتي جوف المجله**واذكروا اسمي يا لعله لا قراها

يذكر الماضي ويسعفني بطله**تنعش الروح العليله من شقاها

ما حصل مني بحق الخل زله**لكن العذال يا ما اكثر لغاها

يا لطيف الروح والأوصاف فله**كل حاجه فيك تتحدى سواها

يا عشيري في الهوى قاصدك بله**حالتي تحزنك لو انك تراها

*****

جول الظباء

هات الربابه واسحب القوس فني**على لحن مسحوب فوق الربابه

ياللي بعذبات المعاني تغني**تقضي حياتك في الهوى والصبابه

أمس الضحى جول الظبا قابلني**يتجولن بالسوق ما هن بغابه

ناديتهن لكن ما عبرني**عين يردن للمنادي إجابه

وراحن كما الأغصان فيها التثني**وعيونهن بالسحر فيها مشابه

وظليت انا بين الرجا والتمني**لو الرجا لا شك ما فيه ثابه

لكنهن بالليل في الحلم جني**واصبحت اقَلِّبْ راحتي في كآبه

****

ألغاز

وش أم مولودها واحد**بالطيب دايم يعشونه

تْحِب دار البدو واجد**وتميل للعشق وفنونه

**

قدام في سالف الأوقات**لما خرجنا تمشينا

لولا الثلاث الأوانس جات**ما كان حنا تعشينا

**

واش بنت زينه والمخاوي لها زين**عذره بدون سنون تاكل عشاها

ماكولها طيب ولا تاكل الشين**والشيب والشبان تعشق هواها

**

وش بنت تحرق نفسها في حماها**وتحرق فلوب اللي يحبونها زود

أخواتها واجد وعودٍ نماها**والعود لا ماتَن بناته بلا فود

****