كسرات - مفرج السيد

لا شدني الشعر والأشواق=جردت سن القلم لي سيف

باقه أعطر بها الاذواق=ألوانها مثل لون الطيف

**

تنهدت بس تنهيده=خلت فؤادي وعقلي يطير

من بعدها رَوَّحَتْ سيده=كل الذي في بدنها يثير

**

ما فيه غير الهوى رجال=نجعل منه دوم شماعه

في حبها تحضر الأجيال=وتقدم اعذار لماعه

**

لو يكشف الحب عن قلبي=ويشوف ما فيه دون حجاب

دايم معي موقفه سلبي=وانا معه موقفي إيجاب

**

اقسى على الود من جدي=لكن أرجع معه والين

واصبر إذا ما قسا ودي=واهواه في كل وقت وحين

**

أهرب من الحب بالعاني=ويردني شاهي الأعيان

لا سلهم العين يرعاني=مثل الرعيه مع الرعيان

**

كل الجماهير أحبابي=اللي على موقعي يثنون

بالشعر فاتح لهم بابي=واحطهم في سواد النون

**

بارزاقها طارت الأطيار=هذا مثل من مثايلهم

والكيف يوجد لدى العطار=ردي على قول سايلهم

**

الحب مثل اخطبوط البحر=لا صادله شخص يمتصه

واحيان يدخل بصيده جحر=واحيان بالنص يقتصه

**

من يوم وانا طفل بالمهد=واهلي يريدون تهذيبي

واليوم لما تقافى العهد=يا جهل يكفيك تعذيبي

**

قدام والكل في صفي=أيام كان الشباب الزين

واليوم العمر متقفي=ما شفت لي ما يسر العين

**

ظليت يوم الصبا بالحيل=حتى الهوى رق من أجلى

شاعر وفارس وراكب خيل=واليوم ماشي على رجلي

**

قدام كانت لنا آمال=واحلام كانت لنا تبنى

واليوم نبقى كما الأطلال=من يوم باعمارنا شبنا

**

ما عاد حاجة وتكفيني=لا احب قهوة ولا اهوى شاي

ولما الهوى صار يجفيني=ناديت للحب باي وباي

**

عند العرب للغرام أصول=في أول الوقت والحالي

من لا صبر ما استحق وصول=ولا فاز مع شوطه التالي

**

انظر تدبر بخلق الكون=عجيب من صنع خلاقه

فيه الجمالات شكل ولون=حتى البشر زين باخلاقه

**

يا رب نرعي سماواتك=وسبع الاراضي عليها نسير

يا غافر الذنب لامواتك=واحنا لنا تكتب التيسير

**

صبغت راسي وقلت ارجع=شباب في سابق سْنيني

لكن قلبي غدا موجع=كل شي بالقلب يضنيني

**

 صحيح إن الذي له مال=في الوقت هو الذي ينجح

يا رب تصلح لنا الأعمال=بالفضل في الآخره نرجح

**

اقطع لي اليوم واقطع لك=قانون في عهدنا الساري

يمكن أسلم على نعلك=واطعنك في الخلف بيساري

**

عمري وهبته لمن حبيت=مني هبه مالها مردود

وكل ما طلب له طلب لبيت=عين المها ما يشوف ردود

**

في محجري دمع متحجر=بالعين لكن عيا يصب

قدام كالنهْر متفجر=أيام كان الفؤاد يحب

**

مره تجينا بكل اسبوع = جمعه تنور مساجدنا

واحنا بها سعينا مربوع=وبكل ما عندنا جدنا

**

آنتي لنا بالبداية أم=والأخت من بعدها والأهل

وهي بنت خالك وبنت العم=اللي تشيلك شباب وكهل

**

أهل الهوى بالغرام عطاش=والكل خله رفض يسقيه

وانا معه مثل طاش وْطاش=أستعطفه دوم واسترضيه

**

هي الحبيبة وهي الأم=والأخت والبنت والزوجه

هذي المَرَه عندنا يا عم=حتى ولو تختلف موجه

**

أبغى أحطك بجوف الرمش=واخلي الرمش لك حارس

والا أشيلك بكفي خمش=واروح بالقلب لك تارس

**

اليوم والحال مثله أمس=والليله اللي كما البارح

تطلع وتغرب علي الشمس=والفكر في حالته سارح

**

عصرت لون الخدود وصار=مثل العسل في قواريره

واحتار في صنعه الأنصار=من حسن صنعه وتكريره

**

هذه الكسرة لا ترتبط بالتي قبلها

دايم علومك تراها قصار=خليك مثبور في بيرك

احذر ترى لا يجيك اعصار=تُكسر كسر صعب تجبيرك

**

الحب أقسى من الجندل=ومن الصخر في جباله صم

كم من قُتل فيه ومجندل=تروح روحه هدر والدم

**

أنا معك في الهوى قاسي=لجلك بتقسى معي دايم

يا حب شيبت لي راسي=ولا زلت في خافقي قايم

**

يا حب شيدت لك مسكن=وسط الحشا من زهور وورد

كل الرياحين لك ضحكن=وانا فقط بانتظارك فرد

**

اليوم سافر حبيب الروح=واصبحت بالدار وحداني

عقب عليَّه أسى وجروح=شوف الهوى وين وداني

**

من حط مفتاح في كالون=يلقى طريق السلامه بَرْح

والناس قالوه ويقولون=حتى البدو تحت ظل السرح

**

الله رب البشر معلوم=ومن يتبع المصطفى يهديه

والدين الاسلام دوم يدوم=أما الملك والوطن نفديه

**

كل العمل ما بدا باسمه=سبحانه الخالق الرازق

إبليس ياخذ مِنُه قسمه=شيطان يلزق بنا إلزاق

**

مع الشباب الذي يصنع=كسرات بالنت عصريه

لكن ذا شي ما يمنع=ندخل ولا النت حصريه

**

يا ليت قلبي من الفولاذ=مشاكل الحب ما تهمه

لما لجا بي وبيه لاذ=بقيت اواسيه واضمه

**

صاف العنب في الشفايف صاف=والصدر مثمر بتفاحه

طلبت انا العدل والإنصاف=قابلني الرمش برماحه

**

يا حب يا مبتلي للكل=سعيد والا شقي راعيك

غرست لك في فؤادي فل=من يوم وَصَّفْك لي داعيك

**

ظليت انا والهوى أحلاف=والكل منا مع الثاني

واليوم حاصل معاه خلاف=روح ولا عاد يلقاني

**

يحن قلبي حنين النيب=اللي لحيرانها تشتاق

واحيان يطنب طنيب الذيب=لا شك ذي حالة العشاق

**

يا كامل الزين والأوصاف=يا اللي بصدرك نهود صغار

وصفك قمر خالف الإنصاف=لجل القمر من سناك يغار

**

يا الله يا ربنا التسهيل=سهل لنا الحال يا ربي

كل شي عندك وله تأهيل=ظاهر ولو كان متخبي

**

رشحني الحب قايمقام=للحب منُّه جزا ليه

لكن لما جنابه قام=قدمت له عرض غاليه

**

لما بكى الحب بكاني=وانا رقيق المشاعر دوم

سكرت بالسوق دكاني=وسويت مأتم هذاك اليوم

**

ما فيه بيني وبينك شي=يا حب يا اللي عديل الروح

أستقبلك وانت عندي جي=واستودعك يوم عني تروح

**

 يا حب عايش على ريحك=من يوم فارقت مني الخمس

يا كم تظللت من شيحك=واليوم تحرق حياتي الشمس

**

حياتنا كل ابوها حرب=والكل حقه يقف دونه

ويا ويل من هو مشى في درب=للغير عنها يردونه

**

لما يجي للسفيه لسان=لا بد لك حق في ردعه

تحمي مكانتك كالإنسان=لو كان تعبان في بدعه

**

هل الهوى يا جماعه نهج=طريق والناس يعطونه

أسمع لطاري المحبه رهج=والناس صابوا ويخطونه

**

إن كان لك بالشعر رغبه=بالشوق والا بدون الشوق

دور على قافيه صعبه=وسوق المعاني عليها سوق

**

ابقى ارتفع فوق ما أنزل=عن مستوى ما تريدونه

واعيش يا احباب في منزل=في صرح ليَّه تشيدونه

**

لما الأسد قابله حصني=قال التلطخ بدمك عار

هذا الذي كان ينقصني=لو كان في ساحة الأشعار

**

العفو والمعذرة واجب=عند الذي يعرفون الشان

والقلب والعين والحاجب=تفدي الذي بالصدر نيشان

**

خواطري يوم طبعي زان=تأتي كذا دوم عفْويه

واكيل للناس بالميزان=واقدار الاحباب موفيه

**

نرجع إلى صفحة الأحلام=الحب يا عاشقين الحب

يا واصفه جفت الأقلام=لو حبرها من عميق الجب

**

تصبح على خير يا شعري=بكره الاقيك بالأحضان

غالي ومعك ارتفع سعري=وعندي دوا منك للمرضان

**

أستغفر الله إذا ما امسيت=وبالصبح يا رب سبحانك

لو في حياتي أنا قاسيت=باصبر انا نلت ريحانك

**

يا بدر يا اللي ترابك مسك=أما صخورك ذهب والماس

وزيارتك بعد مكه نسك=وبعد المدينه يراها الناس

**

صفحات في الحب مطويه=واللي نشرها لها شاعر

في أرض ما هي بموطيه=بقلوب فيها اللظى ساعر

**

مهما ابتعدنا عن الأحباب=والحب نرجع لهم في الحين

قصة وتروى بكل كتاب=وغنوه وتبغى لها تلحين

**

إن كان لك في الشعر رغبة=بالشوق والا بدون الشوق

ابحث على قافيه صعبه=وسوق المعاني عليها سوق

**

قال الحبيب الذي هاجر=بيزورني بعد غيباته

اللي بحبي سبق تاجر=كني بضاعه بجيباته

**

أهتم انا دوم في موضوع=حتى اشبعه بحث ودراسه

مثل القرنفل شذاه يضوع=والا كما البن ممباسه

**

أمشي بدربك على مهلك=لا تكون بالسير مستعجل

مادمت بالدار عند اهلك=ما هو سبب سيرك المعجل

**

ظليت انا بالهواى لي ساس=راكب وماشي على الأقدام

واليوم دون الهوى أقواس=ما هو مثل زهرته قدام

**

من تجرباتي ومن علمي=عشرة عمر عشتها رحال

أموت ما ينقضي حلمي=وكل البشر في هذاك الحال

**

تاجر شرى في الغرام وباع=ونهاية الحب معروفه

بالحب ضيع ثلاث ارباع=عمره مع الربع ببروفه

**

ما ابيع انا الحب من طبعي=يمكن انا بالغرام اهديه

ذي سالفه صدق يا ربعي= إن كان من بعد ما أرديه

**

مره هجرني الذي أهواه=تدرون وش لون عاملته

واللي خلقني وهو سواه=قطعت ما فيه أمَّلْته

**

ياكم واحد يبى الشهره=تلقاه يطلع جبال طوال

تلقاه يطلع بها جهره=واحيان يسقط بها في الحال

**

يا ليتني ضلع فوقه ثلج=حتى يتزلج عليه حي

ما هو من اهل الخوارج علج=من أهل هذي الديار هِنَيْ

**

أعز الله الجميع ويا أصحابنا سامحونا

شعري اخترق حاجز الأوزون=حلق بجو الشعر عالي

واشوف بعض الشعر موزون=لولا الحيا ارميه بنعالي

**

خشم البخاري صحيح الشم=أكله على نارها تطبخ

شوف الهدايا لهم بالكم=ويده ورجله سوا تلفخ

**

نيران في صحتي تحرق=لما زماني يزيد الميل

وتمر الأيام ما تفرق=عندي نهاري يساوي الليل

**

لا هوجس القلب بالأفكار=قامت هموم الصدر تنباح

والشعر جا يحمل الأبكار=والطرف سهران للإصباح

**

يا سيداتي وساداتي=هيا اسمعوا موجز الأخبار

الكره ما هو بعاداتي=قلبي نقي ما عليه غبار

**

الحب ذا شي من حقي=عمري صبي أو زماني كهل

واختار في الحب وانقي=وانهل لكاس المحبه نهل

**

الحب يمشي على الرايق=حسب القوانين والناموس

وان حال من دونكم عايق=يمكن تجيب الهوى بفلوس

**

ساس الهوى مصدره كسره=بالدان والآه والونه

تترك بقلب الشقي حسره=لا صار في داخله حنه

**

ما ابقى اتكلم عن الكوره=لأن منها حساسيه

ركز كلامي على صوره=للحب تبقى أساسيه

**

ما مر في كل طلعاتي=يوم الشباب الذي لي كان

أروح وارجع لقلعاتي=واجلس بها ماسك الأركان

**

يا ظبي مرباك في قلبي=لو كنت عني بعيد الدار

ولو كنت يا ظبي تلعب بي=يا ظبي عند لك المقدار

**

يا حسام با اقولها بيتين=بيتين ما أزيدها واحد

يا حسام حصلتها ثنتين=دنيا وأخرى بلا جاحد

**

فارس بصهوة حصانه هل=بالشعر وحده بذيك الدرب

كأنه كْليب ومهلهل=في قومهم وسط ساحة حرب

**

شاعر وفي الشعر متعلي=راجح ويرجح به الميزان

ما هو كما الفيلسوف اللي=ثابت على القول شان وزان

**

شاعر مع الشعر ميلادي=وعاشق مصنف مع العشاق

هايم وولهان ببلادي=وبُعْد الثلاثه عليه شاق

**

أراك بالشعر متشعبط=مثل الذي يركب الأِتْبيس

عبيط والا انت مستعبط=تنزل على البحْر قبل تقيس

**

لا راي عنده ولا له شور=ويدربح الراس خلف الناس

لكن له بالعماله دور=ممتاز في ساير الاجناس

**

أخلصت لك من صميم القلب=بذلت لك كل ما ترجيه

وعاملتني مثل فعل الكلب=اللي يعود على راعيه

والله يعز المشاهدين

**

حييت يا سيدي سلمان=حيابك الشعب في دارك

تجري علاقات جنتلمان=والرب بالجهد لك بارك

**

حطيت يدي على يده=ناتج خطا في زحام الناس

جرد لي السيف في حده=حاكم عليه بقطع الراس

**

ناديت واسمع صدى صوتي=واللي أناديه عيا يرد

تمنت النفس لي موتي=ولا يوم يحكم علي بالصد

**

فراعنة مصر في السابق=وجيش كسرى وجيش الروم

جمعتهم يوم في طابق=ماردوا الزين عما يروم

**

قلبي يكافح جيوش الحب=جيوش بالأرض جراره

واحيان يسلم وحين يطب=ودموع بالعين مدراره

**

لو حيروني ما بين النظم=والا الأكل وقت وحداني

الأكل حاجه تقوب العظم=والنظم للخلد وداني

**

تحية العز يا ساده=تحية الذوق يا ستات

عندي احترام البشر عاده=ماني فضولي ولا لَتَّات

**

معتق بفن الشعر عملاق=ولد الشماسي من اقطابه

رجال في منتهى الأخلاق=مثل المهند ويسطى به

**

كالعنكبوته يمددها=اللي يسمى لها كسرات

من كثرها ما تعددها=والشعر يشكي من الحسرات

**

لا مال قلبي أنا بالحيل=ما كب غيره ولا أبقاه

حبي سوات المطر والسيل=لا سال شال الذي يلقاه

**

الحب إنك تحب الله=وتحب خير البشر والناس

واهلك وديرَتْك في معناه=وحب الملك تاج فوق الراس

**

مبعد عن الحب من أعوام=فوارق السن تقصيني

لكن عشت الهوى أكوام=وين الذي فيه تعصيني

رسالة إليها - مفرج السيد

إعلان عن صدور الخبيتي