كسرات مفرج السيد 2

كسرات مفرج السيد

ستاير البعد والحرمان ** صارت لها سنين مرخيه

من يوم ما غاب حتى الآن ** ماله على زيارتي نيه

**

أكل البلح حلو في طعمه ** بس النخل صار في العالي

واللي ما يرضى على قسمه ** يقول يا طول موالي

**

عامل مسلسل على حسابي ** فيه الهجر والعذاب ألوان

أتعبت قلبي واعصابي ** ما انته ممثل ولا فنان

**

رق الحبيب الذي قلبه ** أقسى من الصخر والصوان

قلبي معه كان يلعب به ** واليوم قلبه لقلبي لان

**

أسهر أنا وانشغل في الحب ** وانته ولا انته هنا تدري

كم لي أنا في غرامك صب ** أمارس الحب من بدري

**

مسكين من هو قتل في الود ** ويروح دمه تحت رجليه

ماله ديه في النظام تعد ** ولا يحاكم اللي جنت يديه

**

دمعي انحدر فوق أوجاني ** وقلبي انحرق كنه الفحمه

دمي هدر راح يا جاني ** ما فيك رقه ولا رحمه

**

سؤال داير بلا عنوان ** وما زال في الناس تكراره

القلب والا هي الأعيان ** من أشعل الصب في ناره

**

أبغي أساهم بحل الحب ** واسهم ببعض المساعي فيه

ما فيه دكتور عنده طب ** والا مصل يمنع أو يشفيه

**

تطور الطب واتقدم ** واسهم بشتى مجالاته

إلا الهوى فيه ما يهتم ** ما سجله في سجلاته

**

قرر جناب الهوى حضرة ** المحترم صاحب التقرير

من أجل جرة قلم كسرة ** يدي وتحرم من التجبير

**

للحب شفره ولا تنحل ** قناتها صعبة التشفير

لو ابن كامل بها يدخل ** يعجز وفكره معاها يحير

**

شفت الجزيرة بها الكوره** لما اخذت البطاقة تو

والحب مستعصي الصوره ** إن جيت من أرض والا جو

**

الحب أصبح مسلسل حب ** يعرض بكل الفضائيات

وكل من هب والا دب ** له في الهوى علوم وحكايات

**

يوم انتظر وعد محبوبي ** أعد فيه الدقيقه يوم

وانسى طعامي ومشروبي ** ويطير عني  لذيذ النوم

**

كم لي مع الحب فمواجه ** بس الهوي غير داري بي

كل ما طلبت الهوى حاجه ** عيا يلبي مطاليبي

**

قالوا لي ان الهوى فاتك ** سافر قطاره مع الناشين

يا حب يا زين همساتك ** كم فيك من ناس محرومين

**

ليه القمر مدرق عنا ** وش حاجبه عن حجاج العين

ما ادري خطا صار له منا ** والا دلع من جناب الزين

**

للحب باعمل أنا اوبريت ** من كثر ما الحب عناني

حرق فؤادي كما الكبريت ** وفي ساير الجسم كواني

**

يا سادتي لا تلوموني ** لجلي بشر فيه لحم ودم

أصيب في بعض مكنوني ** واخطي وربي الذي يرحم

**

حق الأمومة على الاولاد ** وحق الأبوة أمر واجب

أحنا لهم فلذة الأكباد ** وهم عندنا العين والحاجب

**

دكاتره واختصاصي قلب ** سووا على القلب كو نسلتو

قالوا سلامتك ما لك طب ** الا مع الحب تعمل تو

**

النوم يسكن عيوني كيف ** يومين وانا افتش له

اللي صدفني كأنه طيف ** ما شفت بين العرب مثله

**

أشوف عيني معاي ترف ** ويرف قلبي كما الطاير

تفسيرها زي ما أعرف ** حبيب غالي علي زاير

**

طل القمر في سماه وغاب ** مرت سحابه وغيبته

واللي درس في الفلك حساب ** قام احتفل في مناسبته

**

ما في رجل والشعر حكره ** ولا في بلد محتكر إبداع

وكل شاعر وله فكره** وكل ديره وفيها إمتاع

**

كيف الفرح انثره والقلب ** فيه العنا والأسى مطبوق

واللي سلب نوم عيني سلب ** ما هو من الله من المخلوق

**

ثلثين شعر الهوى أحزان ** والثلث أحزان مع أفراح

والفكر والقلب والأعيان ** تتحمل الآه والأجراح

**

ماني ملك خالقه من روح ** سبحانه الواهب المعطي

أنا بشر من جسد مطروح ** أصيب مرة وألف اخطي

**

اسأل زمايلك يا شاطر ** اللي معي في الهوى قبلك

بالغصب أو طيبة الخاطر ** ما حاولوا ذلتي مثلك

**

كل من نشا بالشعر غنى ** حتى شكت ساحة الكسرات

مثل العشب كل ما قنى ** قالوا رياحين وزهورات

**

الحب سووه منلوجست ** والا فلم حب كوميدي

والكل معه يلعبون الدست ** وإذا زعل قال يا سيدي

**

يا مسرحية هوى تعرض ** أبطالها من شهود اليوم

من عرضها الذايقة تمرض ** طيش ولهو والمآسي دوم

**

ما دامت اعرف أساليبك ** لا تظنني انخدع وياك

واقعك يكشف أكاذيبك** اللي تبرر بها دعواك

**

راحت تمثل على قلبي ** تظهر لي الحب والإخلاص

وأنا لها أعلنت عن حبي **وكلنا في الحقيقة قاص

**

لما أعبر بكسراتي ** عن الوصل والهجر والحب

ما هو ضروري أصف ذاتي ** يمكن أصف حال غيري صب

**

يا كم لقمة تصل للفم ** ما يذوقها فم راعيها

ما يذوق غير الذي يقسم ** واللي تجي بأمر واليها

**

ضرب المثل ما انفرد به شخص ** ولا يملكه ناس مختصين

لكن ما يشتري بالرخص ** خبرة زمن في العنا واللين

**

لا تنصح العاشق المغرم ** لا تقول للعاشق ألا زيد

العاشق أضيح عمى أطرم ** غير الذي يعشقه ما يريد

**

يا اللي مناخرك في العالي ** ما انته ذهب والخالق طين

واو لك واوسطك التالي ** تحت الثرى تصير يا مسكين

**

قوم اتقي الله يا مسلم ** واحفظ صلاتك وايمانك

بكره قبر تدخله مظلم ** اللي مهيا على شانك

**

خرجت عن سكة الكسرة ** اللي بفن الهوى تختص

عالجت أوضاع منتشرة ** في كل حالة خرج لي نص

**

رجعت على الحب أشعاري ** لجله مدار الشعر والفن

اللي خضع فيه إجباري ** من يسكن الأرض أنس وجن

**

شوف الشعر منفتح بابه ** وأنا تقدمت للميدان

ما هو تحدي لأصحابه ** ولا أقول وين أنت يا حميدان

**

أبغي أعبر عن أحساسي ** وشعوري اللي حبسته يوم

هم حاسبوني على أنفاسي ** اللي سعوا في القطيعة دوم

**

أرسلت لك يا معالي الود ** معروض من بعد برقية

ما أدري علامك علي ما ترد ** قلي على القصد والنية

**

كانوا ثلاثة سوا بالدرب ** عاشق وسالي مع محايد

وبلا وعي في شباك الحب ** طاحوا وأصبح لهم صايد

**

يا ليت ذاك الشباب يعود ** وبكل طيشه وبجنونه

مليت بالبيت وحدي قعود ** ما حد نظر في بعيونه

**

يا بو الشفايف كما العنقود ** فيه العنب مطعمه حالي

وإذا رمى بالعيون السود ** صابتك لو كنت في العالي

**

أسما لمي بعدهم ريناد ** يا ذروة الحب في أمري

هم جسدوا روعة الأجداد ** لما أتوا باخرة عمري

**

عيون فيها النظر ذابل ** ورموشها فوقها حراس

كأنها جات من بابل ** عشان تسحر عيون الناس

**

غنيت أنا للفرح كسرة ** وغنيت للحزن أنا مليون

لجل الفرح صبته قطره ** والحزن يسقيك بالماعون

**

عجيب يا لابس الشفاف ** يا اللي سواة الغصن مايل

مثل الرعد خافقي رجاف ** ومثل المطر مدمعي سابل

**

لو يكتمل غير وجه الله ** لقلت هذا القمر كامل

من حين بالعين ما ترعاه ** الزين في منظره شامل

**

أضغط على القلب لجل أصبر ** والقلب متقطع الأوصال

عن حالتي كيف باعبر ** ما دمت في القيد والأغلال

**

راعي السجن فك لي بابه ** واللي سجن غض عني الطرف

كل شيء هيوا لي أسبابه ** لكن ضميري تحاشي الظرف

**

يا للي اتهرب بعصفورك ** ما تدري أني أنا سيدك

ما اشرب بطبعي أنا سورك ** ولا أكل من اللي تحوزه يدك

**

شوف القمر قال واشر لك ** ايش الذي نزله من جو

قلت الدجى يوم صار احلك ** في الأرض قام ونزل في التو

**

النحس دايم ملازمني ** في الجد والمزح يومي وأمس

إيش الذي فيه يلزمي ** حتى أفارق هذاك النحس

**

قلبي الذي كان به نازل ** واحد هوى شال مفتاحه

جاله هوى حرك العازل ** وخش ما بين الواحة

**

لا تقول كيف الهوى له درب ** في قلب مقفول مغلافه

لجله كما الزرع يبغى الشرب ** حتى الندى يبل أوراقه

**

ما أبكي شبابي وأيامي ** ما دام لي في الهوى ميراث

قدمت في الحب قدامي ** ما يسد عمري مع الوراث

**

يا ما الأحاسيس غرتنا ** تظهر نواعم وهي خشان

وتزيد في الأمر حيرتنا ** ولا بان له في الحقيقة شان

**

من عمق قلبي خرج حبك ** ولا عادلك في الحشا احساس

بعدك يساوي معي قربك ** صرتي معي زي باقي الناس

**

تشيلني من حساباتك ** وأنا معك دوم في الصورة

وانت أفهم الود من ذاتك ** تراه تسديد فاتورة

**

مثل العسل ذوب أو أحلى ** ريقك عسل صب في الأقداح

مثل العروسة إذا تجلي ** مثمر على صدرها التفاح

**

الحب للعاشقين أكسير ** لا ماتت قلوب يحييها

قصة ما تحتاج لتفسير ** لأنه الكل قاريها

**

كل مازهمت الهوى ما يرد ** أو غير موجود في الخدمة

اللي بدا في حوار الرد ** وفي آخره صار لي صدمة

**

جاني وقدم طلب توظيف ** قلت بأسف ما هنا شاغر

جاني فؤادي من الإرشيف ** قلي تجيب الطلب صاغر

**

أطلق رصاصة من أعيانه ** صابت فؤادي بدون عيار

قاضي قضا الحب ما دانه ** قلي بلا عمد أطلق نار

**

سبق الترصد مع الإصرار ** ومزكية مع شهود عدول

ميرادهم كنه المصدار ** والخصم قوله طلع مقبول

**

جينا على باب قاضينا ** أنا وخلي نقف صفين

وقال يبغى يراضينا ** الحق كالسيف أبو حدين

**

ما بين عاشق ومعشوقه ** ما في دعاوي ولا أملاك

حين يتنازل عن حقوقه ** هذا وحين يتنازل ذاك

**

يا ليل نادي السهاري شوف ** من طاب له في السهر ليله

ومن هو سكب دمعه المذروف ** يشكي لليل الدجى ويله

**

يا بدر لا يا بلد جدي ** وجدي اللي سكن قبله

لو تطلع عن مدى ودي ** في كل الأكوان ما مثله

**

أشر ورديت بالتأشير ** كل الإرشارات معطوبة

قال الوعد أولات مشير ** قلت الوعد أخر الطوبة

**

كشفت للناس أوراقي ** ما في خطا عنهم أخفيه

تأبى عن الشين أخلاقي ** ولا أخاف واحد ولا أرجيه

**

لو كنت من مافيه للحب ** زعيمها محترف إجرام

ما كان وقفت دم القلب ** وأعدمت كل العروق إعدام

**

طبيت وادي الشعر عبقر ** دخلت ما بين فرسانه

سابقت بحصاني الأشقر ** اللي أنا ماسك رسانه

**

شوف القمر والكواكب فوق ** فايق على كل نجماته

كنه مفارق براه الشوق ** حط الهوى فيه وسماته

**

شوف الكواكب تدلت لك ** مثل القناديل في العالي

يا ليل يا ليتني مثلك ** من همي اللي معي خالي

**

باسألك يا بدر يوم تغيب ** تقدر توصل رسالاتي

وتجيب لي الرد أو ما تجيب ** ما انته مكلف بجاباتي

**

طبع العصابات تسرق مال ** وانته سرقت الذي أغلى

تضحك على القلب يا محتال ** من لفظك اللي ولا أحلى

**

كل الذي في السما والأرض ** داني من الأرض أو قاصي

قدمت لك عن طريقه عرض ** لكن برضك معي عاصي

**

أرسين لوبين سارق لص ** لكن عنده نظر وقياس

أما أنت سارق ولا تختص ** تسرق بلحظك جميع الناس

**

كتبت لك بالرجا معروض ** استرحم العفو والغفران

 رفضت في حل أمري تخوض ** كتبت يستاهل الخسران

**

يا للي تعاليت بالجبروت ** واتلفت بالهجر لي عمري

بكره بعد طول عمر تموت ** والرب يسألك عن ذنبي

**

قال الهوى شبت يا راجل ** خذ لك تقاعد مع التوديع

وارسلت سرويس له عاجل ** مرفوض أمرك ولا ني مطيع

**

بلاغ كاذب رواه الناس ** إن الهوى شطب بنوده

لكن طلع شيء ماله ساس ** الكون قايم على وجوده

**

قال الوصل والهجر هيا ** نعمل وثيقة وفاق وقرب

لكن جناب الهوى عيا ** وقال يرخص مقام الحب

**

لجل الهوى نظموا تصويت ** نبقيه والا لكم ننفيه

جات النتيجة مع التوقيت ** مليون بالألف ترغب فيه

**

قال الجفا والصفا جيناك ** نبغاك تحكم وترضينا

قلت امعصي يا الجفا ما ابغاك ** لا عاد تنزل باراضينا

**

قالت يعافيك يا مستر ** قلت العوافي يا مدموزيل

عقلي بهندامها هستر ** في موضته آخر الموديل

**

عامل من الريق له كوكتيل ** وموزعه بين كاساته

طعم الكرز مازجه بالهيل ** في طعم تفاح وجناته

**

دخلت أنا للغرام اوتيل ** اللي مصنف بخمس نجوم

لقيت فيه الحلا كوكتيل ** مثل الصور داخل الألبوم

**

كنت اتمشى على الشاطئ ** بحر الهوى ما اتعمق به

قلب لي العال والواطي ** جاني وما كنت مرتقبه

**

بيني وبين الهوى هوه ** كل ما بنيت الأمل ينهار

وازريت باللين والقوة ** اقضي على فارق الأعمار

**

أصدر عليه أمر صارم ** أمشي بدرب الهوى سيده

كفيل حطه على غارم ** مع الحكم سجن تأبيده

**

قدمت معروض باسترحام ** من خدمته يوم يعفيني

قام الهوى خط بالمرسام ** عامين يالقلب ينفيني

**

بغيت أهرب منه بالقصد ** كاتم على كل أنفاسي

سوى حوايه علي ورصد ** شال الفكر ذاك من راسي

**

باحوا لنا كل ما حسنا ** عدنا إلى الخالق الوهاب

من عامل الله بالحسنى ** يفتح بدرب الرجاله باب

**

شفت الهوى وسط قاروره ** يوزعونه على العشاق

بنات كانوا مع بزوره ** اللي أتوا له من الآفاق

**

شايب وقف بآخر الطابور ** يبغي ** يسافر لأرض الحب

نادوه رحلتك في البابور ** اللي بعدما تموت يطب

**

للمشنقة قدموني إعدام ** اللي أنا كنت هاويهم

ما فيه لهل الغرام نظام ** أو شرع ينظر دعاويهم

**

أحمد عطا رايد الكسره ** اللي لها وثق التاريخ

لو كان له رغبة الشهرة ** باعلى السما عانق المريخ

**

يا رب تختم لنا بالخير ** تغفر لنا والعظم ناخر

ياما انحرفنا خطا بالسير ** حتى وصلناك بالآخر

**

لما دعاني وشفت الكرت ** وشفت الاسم بآخره مكتوب

ساعة أنا في مكاني درت ** لجل الاسم كان لي محبوب

**

فتشت في سابق أوراقي ** اللي بها تاكل الأرضة

لقيت فيها الصفا راقي ** الصوت مع زيد والعرضة

**

هيا اسمعوا هذي القصة ** كنا سوا في فصل تدريس

واللي يدرس لنا الحصة ** سواقنا صاحب الأوتبيس

**

قال الهوى قدم بطاقتك ** قلت الهوية أنا مجهول

قال اقفل الباب مع طاقتك ** وعطني مقفاك عرض وطول

**

كل الأطبا بكل الأرض ** تجمعوا واصدروا تقرير

ما عاد ينفع لحاله عرض ** تكرر السم له تكرير

**

الحب أصبح حراج يباع ** مثل البضاعة بعرض السوق

تقليد وأصلي وفيه أنواع ** وجبه خفيفة وشي مسلوق

**

يا طرف عيني كفاك دموع ** يا دمع جرحت أوجاني

ما عاد للرايحات رجوع ** لو أذهب الدمع أعياني

**

اللي نظر لي من العالي ** وقال ارفع الراس باكلمك

وقلي سلامات يا على ** قلت له عسى ربنا يسلمك

**

لا تجعلون الشعر نقمة ** والا مقاتل وضرب سلاح

الشعر من ربنا نعمة ** حطوه في الخير والإصلاح

**

مخضور يا أهل المودة مات ** ومات الوفا والرضا واللين

ترحموا واكثروا الدعوات ** وادعى وقولوا معي أمين

**

اليوم واحد من الأجواد ** اللي نبا ذكرهم شايع

أبو رقيبة وهو عواد ** جا عن وفاته خبر ذايع

**

بالنوم قلي أبو نواس ** إبليس قلي وأغواني

خذ لك بدرب الهوى مرواس ** وارجع لدرب الهدى ثاني

**

العبد ما له سوى إحسانه ** وغير الذي قدمه قدام

مع عفو ربه ورضوانه ** والخاتمة في حجي الإسلام

**

دكتور في السمسمية كان ** اللي يسمى ابن براك

بالصوت ترقص له الأركان ** وإذا عزف تنطق الأسلاك

**

الله أكبر ياما احلاها ** لا رددت دوم في الآذان

والخمس من كان صلاها ** بالخير يبشر وبالرضوان

**

شفت الهوى جا بمشعابه ** نازل بكل الخلايق ضرب

سألت عن سر أسبابه ** كانوا انحرفنا عنه في الدرب

**

سوق الهوى صار فيه أزمة ** خلصت جميع البضايع فيه

باعوه بالكيس والحزمة ** مثل العلف للذي باغيه

**

الحب مشروع متقدم ** بس الزباين وتجاره

خلوه في السوق متندم ** يبكي على سابق أخباره

**

يا ظبي في منظره لايق ** كنه غصن ماس بالأوراق

يمشي على خطوته رايق ** كل ما التفت يلوي الأعناق

**

تواردوا عن قاضيهم ** اثنين في الحب مختلفين

أصدر أمر فيه ينفيهم ** واعرس بها قال حكم الدين

**

يوم القناعة وطيب الفال ** نمشي خفيفين كالريشة

واليوم صرنا متان ثقال ** من كثر ما نفل في العيشة

**

يا محترم يا جناب اللي ** سموك أهل الهوى بالحب

بالله يا محترم قلي ** لجل ايش تبلى عباد الرب

**

في جامعة للهوى صارت ** في مجلس إلا من له دورات

في مايده للقا دارت ** واحنا ما رحنا وهي ما جات

**

قلي صديقي يداعبني ** وانا مدرس وهو تلميذ

تصدر قرارات يا ابني ** زي مجلس الامن في التنفيذ

**

في الحب لا تسمع العذال ** وارعى هوى الحب في زرعه

نزار في الحب أول قال ** إن لم نجد حب نخترعه

**

الحب مثل الهوا للناس ** والزاد والكهربا والما

راعيه دايم معاه احساس ** فيه المفتح كما الأعمى

***

ثلاث تسعات محسوبة من ألف في ناتج الكسرات

وواحد من الألف بصعوبة ** أحزان هذي وذا فرحات

**

هيا اسمعوا مني الإعلان ** اللي أبثه بأعلى صوت

أخذت من ساير الألوان ** فوق الكفاية لحين الموت

**

مثل القناعة فما حصلت ** ترياق منه دوا الطماع

دنياك لو نلت مهما نلت ** منها تشوف العيون جياع

**

قال الذي كنت باحبه ** لما رأى دمعتي بالخد

قلبك أنا كنت بالعب به ** ما كنت أظنك تحب بجد

**

قلي أنا كم كم سويت ** وابدي بطولات عددها

فجأة خرج فار وسط البيت ** منه بغى الروح يفقدها

**

حبل الوصل بيننا مقطوع ** واحنا قريبين باب بباب

ومفارق العين لك اسبوع ** ما كننا في الجوار أقراب

**

على الوفا والوفاق اثنين ** عاشوا زمن في محبتهم

جاهم كأنه غراب البين ** عاذل وفرق جماعتهم

**

هربت مقدار حولية ** عن الهوى في خلا خالي

لقيت جني وجنية ** في وضع ما هو على بالي

**

يا ذكريات الهوى بالامس ** أيام حلوة وعشناها

مازال في السمع منها همس ** وأطياف أمجاد حشناها

**

في بحر الأشواق سافرنا ** باعيان في عمقها زرقا

قاموا وقمنا تحاورنا ** في الحب والشوق والفرقا

**

أهواك لا يكون عندك ريب ** وانت اسأل القلب ويدلك

ودي احطك معي في الجيب ** كل ما تشوقت أناظر لك

**

تبغى على الحب ذا برهان ** رغم الحقايق ورغم الشرح

انظر إلى قلبي الولهان ** في داخله من فراقك جرح

**

عادت إلى سير مجراها ** واستأنفت سيرها بالأمس

اللي أنا كنت أدراها ** وأصونها من يدي باللمس

**

ترى الهوى لصاحبه محنة ** أما تعب فيه والا مات

لا جات في خافقه شحنة ** من كهربا خمسيه مية وات

**

يا رب خل المطر يسكت ** حتى نخلص مقاضينا

وبعدين لو بالسيول بكت ** يا رب ما عاد يعضينا

**

اشر بكفه وليه فال ** والكف مخضوب بالحنا

بنات كنا سوا وعيال ** ولا عاد منكم ولا منا

**

يا سيدي يا غلا قدرك ** بردان والنوم جافيني

باحط يدي على صدرك ** عسى حراره يدفيني

**

يا ليت جو البلد هكه ** دايم عن الحر معزولين

نبغي من الحر ذا فكه ** ونحوز رقه ونكسب لبن

**

فقدت في الحب أنا روحي ** وبين التجارة فقدت المال

ورديت انا المال بسبوحي ** والروح فقدانها ما زال

**

خلك عن الناس مستغني ** وحط الرجا والامل في الرب

يثني عليك الذي يثني ** ويسبك اللي يريد السب

**

اللي بقلبي الشقي أشعل ** فتايل النار والشمعات

وانا الذي كل ما يزعل ** أهل من آجله الدمعات

**

الورد شفته على الشفه ** وشفت الطماطم على الخدين

لكن مختوم بالعفه ** ما تحوم من حوله العينين

**

سحايب الود لا هلت ** تمطر عيون المولع شوق

سنين تهطل ولا علت ** لما الهوى ساقها لك سوق

**

يا سيدي هات ما عندك ** لو هو غضب أو خطأ مقبول

وان كان مديت لي زندك ** يالطيب طيبي لكم مدبول

**

من ريقها صب في الأقداح ** وتحير الناس في شكله

اللي يقولون من تفاح ** واللي عنب قال طاب أكله

**

يا اللي زمانين هاجرني ** وأصبحت بعد السعه في الضيق

واطلب عسى الله يا جرني ** وانته عسى فالك التوفيق

**

جاني الهوى يوم يضحك لي ** وقلي ترفعت في الأشواق

قدمت أبقي منه فصلي ** واصدر حكم في الهوى لي شاق

**

تخاصموا في الهوى شخصين ** والكل صمم على قسمه

الحق ما ينقسم نصين ** قاضي الهوى قال في حكمه

**

آه الهوى يوم يجفيني ** يجعل حياتي شقاوية

ولما وصاله يصافيني ** انسى همومي وما بيه

**

قالت تحب العيون السود ** قلت اختشي من مراميها

والحاجب اللي لها معقود ** حارس من الناس يحميها

**

لطفك لنا يا لطيف الكون ** ذا سر خافي من الأسرار

دايم لنا في المصاعب عون ** إذا بنا حارت الأفكار

**

اللي رماني بسهم الود ** أشرت له يوم صادفته

قلي انتظرني يجيك الرد ** روح ولا عاد انا شفته

**

ابغاك تنظر لمآساتي ** بالحق ما ابغي جزا واحسان

يا ما عزفتك بلمساتي ** بالقلب والعاطفة ولسان

**

الحب لامر دون خصام ** مثل الأكل قل فيه الملح

يمضي على ذلك الهندام ** ما زان فيه الغضب والصلح

**

معروفك اللي مغطيني ** ما اسدده لو بذلت الروح

الله من العمر يعطيني ** حتى اجي لك ومعك اروح

**

يا ورد يا اللي شذا عطرك ** تعطرت منه الأنفاس

صب اللمى من جنى قطرك ** ذوب العسل واسكبه بالكاس

**

يخطيك سهمه ويخطيني ** يوم القدر والصدور بروح

منزلك فوق السلاطيني ** ما بين سالم على مسروح

**

صبرت حتى شكا صبري ** ومل صبري وانا مليت

ما كان بالطوع بالجبري ** صبري على كل ما لا قيت

**

الجو هذا يباله جو ** يزيد من روعته روعات

وكل الذي راح واللي جوا ** يقضون في ساحته ساعات

**

الله خلق لك عيون تشوف ** وآذان تسمع مناديها

تشوف من بالحنان يروف ** وتسمع اللي معاديها

**

يسعد صباحك صباح الخير ** والورد والفل والريحان

صاحي قبل ما يوص الطير ** حتى أشاهدك بالأعيان

**

اللي ستر لك وفوقك ثوب ** تبراك في كل أحوالك

تاقف معك في نهار النوب ** ترعى لك البيت وعيالك

**

إن كان عندك من الجرأة ** كسب التحدي مع الإصرار

انصحك لا تتبع المرأة ** ترميك في هوة الأخطار

**

قلي ابا هجرك محبوبي ** قلت الهجر منك ايه يعني

يا كم كدرت مشروبي ** شاريك والا انت با يعني

**

شمس الأصيل أوشكت لغروب** ساعة مسا جوها سحري

شعاع مثل الذهب مسكوب ** وقت الهوا هبته بجري

**

في واقعي أو خيالي دوم ** أراك في الوصل أو هجري

وان مر من غير شوفك يوم ** ما ينحسب يوم من عمري