كسرات

****

كسرات

سوس الهوى

سوس الهوى سايسه بسياس**خلي خطاويك مدروسه

وقبل البنا جوده بالساس**من خوف لا تنخره سوسه

**

السن بالسن والخد بالخد

قالت لي اقرب معي لك سر**وبالخد قامت وعضتني

وما زلت للآن وانا مصر**رد الهديه لها جتني

**

الهوى من نظره

يا أنت يا هوه يا حضره**يا اللي رأيتك على غفله

ترى الهوى صار من نظره**واصل السبب ليلة الحفله

****

قالوا وقلنا

كسره وردها

يقول الشاعر الكبير أديب الكسرة عايد بن حامد القريشي رحمه الله

صب الهوى الراح في كاسه**وعطره من شفايف فاه

ولما بخل به على ناسه**قام رجعه في قزايز ماه

وقلت :

من واقع الوضع وقياسه**والحاصل اللي منه شفناه

هذا شعوره وإحساسه**يمنح ويمنع حسب رؤياه

**

وقال ذيبان بن سعيد الفايدي

تطوي بنا عجلة الأيام**سجلها والأمل راقي

لكن إذا تسبق الأحكام**ما حكم الايام في البادي

الرد مفرج السيد :

نعيش ونحقق الأحلام**ونسير والله لنا واقي

واذا أتت قدرة العلام**يبعث لباقي الأمل شاقي

**

يقول عبد الرحمن أحمد الخطيب :

أوصف لكم كامل الأوصاف**اللي أشغل الناس باوصافه

محروم قلب الذي ما شاف**حزين قلب الذي شافه

وقلت :

لما خطر مايس الأعطاف**قدامكم ماست أعطافه

في كامل الأنس والألطاف**بلغتنا كامل ألطافه

**

قال أحمد عطا قاضي :

مستكمل العلم والجاهل**تحاوروا في القضيه ليه

ترك المحبه من الساهل**والا من الصعب والا أيه

وقلت :

عزاب قالوا مع الآهل**لما أتاهم سؤال البيه

الحب كالشرب للناهل**من ينزع الما ما بين يديه

**

وقال أبو تاج أيضاً :

أباسألك عن جناب الورد**من عادة الورد يذبل ليه

بالصيف والا بوقت البرد**من غير احد يلمسه بيديه

وقلت :

لجله رقيق الحواشي فرد**بالحسن يذبل كذا يا بيه

لو ترسله في بريدك طرد**والا انت رأيك جنابك أيه

**

يقول ضمن  عواد السناني :

إن كان ماجد رجل هداف**عميد للفن والكوره

من الذي للشعر والقاف**ياقف على راس طابوره

والرد مفرج السيد :

عمادة القيل فيها خلاف**ما هي على ناس محصوره

وكل شاعر وله ميقاف**وكل واحد وله صوره

**

يقول عابد العويضي :

شاعر انا والعب الحادي**ومن الهوى في قليبي شرخ

ويش الذي أنبت الكادي**جنب السلم والعشر والمرخ

والرد من مفرج السيد :

الرد جا لك من الوادي**اللي الشعر عندهم باليرخ

ذا شي في منبته عادي**مثل الربيعه بجنب الفرخ

**

يقول عطية الله بن محمد الحنيطي :

والله ما احسد كثير المال**ولا كل ضابط معه بوليس

أحسد كبير الملم لا قال**قم يا ولد دخل العريس

والرد مفرج السيد :

وانا وكل اللوالب عال**جالس وساكت ومخزي ابليس

واذا حصل شي من ذا الحال**أروح في آخر الدهليس

**

يقول عبد الرحمن الدميخي :

كاس الغرام العليل العذب**سقته لكفه وانا ظامي

ولما ارتوى من غرامي صب**باقيه في الأرض قدامي

وقلت :

ما دام آثرت له بالشرب**من حبك الزاخر الطامي

قل له جبا من غرامي عب**وما زاد صبه على اقدامي

**

يقول محمد يوسف الشريف :

قيد الأسى في يديني حط**وكبل يدين العزيز الحر

بين الأمل والمؤمل شط**كيف اعبره والعبور يضر

والرد مفرج السيد :

ما دام قفل عليك الخط**وما فيه معبر عليه تمر

ما احط فوق الحروف نقط**حتى انقذك من أساك المر

**

يقول سالم ظاهر الحجوري :

مين الذي في الهوى سارق**ومين الذي في الهوى مسروق

هو الهوى ملك للعاشق**والا الهوى ملك للمعشوق

وقلت :

سهم الهوى لا غدا راشق**يسرق لذيذ الكرى في الموق

أما الهوى ملك للواثق**اللي معاه الهوى موثوق

*****