قصائد شعبية

قصائد شعبية

لطيف الروح

الهوى في وسط قلبي حط عله**يا جروح الحب وين القى دواها

عبرتي من فوق عيني مستهله**آه من روحي شكت قاسي هواها

انشروا له قصتي جوف المجله**واذكروا اسمي يا لعله لا قراها

يذكر الماضي ويسعفني بطله**تنعش الروح العليله من شقاها

ما حصل مني بحق الخل زله**لكن العذال يا ما اكثر لغاها

يا لطيف الروح والأوصاف فله**كل حاجه فيك تتحدى سواها

يا عشيري في الهوى قاصدك بله**حالتي تحزنك لو انك تراها

*****

جول الظباء

هات الربابه واسحب القوس فني**على لحن مسحوب فوق الربابه

ياللي بعذبات المعاني تغني**تقضي حياتك في الهوى والصبابه

أمس الضحى جول الظبا قابلني**يتجولن بالسوق ما هن بغابه

ناديتهن لكن ما عبرني**عين يردن للمنادي إجابه

وراحن كما الأغصان فيها التثني**وعيونهن بالسحر فيها مشابه

وظليت انا بين الرجا والتمني**لو الرجا لا شك ما فيه ثابه

لكنهن بالليل في الحلم جني**واصبحت اقَلِّبْ راحتي في كآبه

****

قال الرحيل

جاني الحبيب اللي معي في الهوى مال**وانا أقاسي الهم وازداد همي

قال الرحيل وقلت لا وين رحال**قال ارتحل لديار أبويه وأمي

داري عن الرحله وعالم بالاحوال**لكنها كلمه بها فاه فمي

غروٍ كأنه ظبي بالبر جفال**رماه حظي والبخت في ملمي

اللي معيشني معه عدة ليال**لكن فيها خالط الدم دمي

كأننا عشنا سوا سنين واجيال**وانا ولد عمه وهو ولد عمي

وحل الرحيل ومدمع العين همال**ويا ليتها ما لدت الطرف يمي

وقامت تلوح لي بمنديل مع شال**وانا ألوح من يديني وكمي

أمانه خلني دوم بالبال**وان قال قايل ما اسمها لا تسمي

وقلت الأمانه في عميق الحشا تشال**وانا غزير السد في بوح جمي

وراحت ولكن الهوى بيننا طال**هي من وفاها يوم انا من متمي

وانا بعدها في السلاسل والاغلال**كأنني مسلم تولاه ذمي

تحكمني ظروفي على كل منوال**وليا فرحت شوي أرجع لغمي

****