كسرة وألعاز

كسره وردها

يقول مفرج السيد

سؤال نازل على الشاشات**منشور في صفحة انترنت

هو الرجل مصدر الآهات**والا الهوى مصدره من ست

والرد من الشاعر نفسه :

شفت الذي بان بالصفحات**واصدر عليه الحكم وابت

أحيان قلبين ُمؤْتَلْفَات**واحيان جانب وجنب مشت

لغز وحله

يقول مفرج السيد :

وش هو رجل في علو الشان**وان غاب ما طالب مغيابه

ما قط صلى وحج وصام**والناس دايم تقدابه

والحل من عواد حمود الزليباني رحمه الله :

اسمع كلام المدير العام**اللي لكم وجه خطابه

نجم الجدي في السما دَوَّام**ثابت على راس مرقابه

**

ويقول أحمد دخيل الله الكرنب رحمه الله

وش الذي في طلوع الشمس **يحيا مسا والصباح يموت

حَيْوَان طاهر وما هو نجس**ما يشرب الما ولا له قوت

والحل من مفرج السيد :

اللغز جانا نهاره أمس**والحل وارد عليه ثبوت

هذا الجدي نجم ما هو نفس**في الليل يلمع كما الياقوت

*****

ألغاز

رجال ما تشد له حيلك**خلك معه في المشي بالهون

واذا زعل منك يا ويلك**لا قام سلط عليك عيون

**

واحد متر في متر محدود**ما بين إسمنت أو طينه

أول لنا من مداه يجود**واليوم لا كف يا زينه

**

فرصع لي العين خوفني**اللي براسه ثلاث عيون

بعده سمح يوم وقفني**ممنون مني وانا ممنون

**

اللي لها في السما رحله**دايم وهي رايحه جيه

ما هي فراشه ولا نحله**لكنها مثلهن حيه

**

وش بنت بالأب مقطوره**واحيان هي وحدها في دار

تصرف حوالات ممهوره**باسعار والا بدون اسعار

**

واش بنت مصورفها في اليوم**محدود لا جات تستوفيه

ولو حطوا الزاد كوم وكوم**عن حدها ما تفكر فيه

**

اللي توجه نظرها شام**لكن مقصودها قبله

يحتاجها الخاص والا العام**واللي لهم في السفر رحله

**

اسم الذي شرف الأكوان**موجود في محكم التنزيل

ثلاث بالإسم في القرآن**واثنين حرفين بالتفصيل

**

تسعين واحد معاها يكون**وتسعين والخمس تبراها

لا جيتها تنظر الماعون**حتى بالارقام تقراها

**

خطوه توقف وخطوه دون**وخطوه على طول تمشيها

وكل خطوه بشكل ولون**والناس بالعين ترعيها

**

من يوم عهد الجاهليه في القديم**موروث شاين في البدو والا الحضر

يسعى سواة النار تسعى في الهشيم**واكثر وجوده في الصعيد وفي مصر

**

ما تلتفت قالوا عليها البداوين**ترجع بكاملها وتنظر وراها

اللي لها في الغدر طاري إلا الحين**باقت بصاحبها وشقت ذراها

**

واش أم تنجب من الأولاد**في بطن واحد لنا عشره

بنتين تحسب من المعتاد**خمسه مع البنت في خشره

**

كل البشر نالوه ما غير الثنين**ما جربوا فيه العطا والإمتناع

حتى الذي أعطوه شالوا منه دين**ردوه فيما بعد فيه الصاع صاع

**

في اليوم خمسه بست أيام**وفي اليوم سبعه بلا نقصان

كل الخلايق لها ينقام**وكل المدن حقها ينصان

**

أثنين دايم على الجنبين**وواحد على الصدر بشماله

شيالهم يخدمونه زين**حراس حتى على ماله

**

له حلق له صدر له يدين**رجلين ما له ولا له راس

ملزوم لك تاخذه لو دين**حتى يخاويك بين الناس

**

من عهد خير البشر قدام**يوم الصحابه يجلونه

الحظ له بالسعد بسام**كل الخلايق يبوسونه

   

**

وش أم وعيالها وُرَّاد**والأم تشرب وتسقيهم

والناس حبوا على الأولاد**حتى ملكهم وقاضيهم

**

مرفوع لكن ما هو مضموم**منصوب ما جاته الفتحه

عند العرب والعجم والروم**ما يفارق الجيش لو فشحه

**

تسعه بخمسه عيال العود**وابوهم العود حاشدهم

دايم يجي نفعهم والفود**من ضربهم جنب والدهم

**

موية عمارتك تبغى لي** وجدارها تنقصه مونه

بين الكواليس يكمن شي** يصلح مع الحوت والتونه

**

يا الله يا منشي الربان**تكفيني شرور جن بيه

في آخر البيت ليه بان**قطعه من سلاح مخبيه

**

عذره تجي من بقايا عود**حمره وترجع لنا سوده

وأخضر أبوها بلونه زود**قدام في أمه العوده

**

تعطيك ما تاخذه منك**خالي من الزيف والتزوير

كشرت والا ضحك سنك**ما تعرف الرسم والتصوير

**

وش أم في جنبها بنتين**أو بنت من صنع صانعها

هن يظهرن بنت شوف العين**وتشيلها ما تمانعها

**

جمرة غضى بين ذرعانه**يشتالها من لظى النيران

هذا صنيعه وذا شانه**من يوم ما كانت الأكوان

**

رجال نشمي طويل ذراع**والناس تشكر لمعروفه

تلقاه وقت الطلب فزاع**واخوه مَيَّل له كتوفه

**

من جوف أمه أخذ ما طاق**مولود دايم بجنب امه

واهداه للي لها يشتاق**تفتح له الرمش وتضمه

**

آنا بأول هذاك الشي** وفي آخره فيه غيري ناس

من قرص موجود جوف المي**تاكل وتشرب منه بالكاس