ألغاز

ألغاز

وش بنت تنسب لرجل خيار ** والرجل له أم قبل أمه

والبنت ترجع ولد هودار ** تأتي له الأم وتضمه

**

الرجل ذا نذكره بالخير ** جملة بناته ثلاث أبكار

واحد ولد يتبعه في السير ** صبح ومسا شرفوا بالدار

**

الل يخصك ولك مرصود ** والناس تستعمله بالدوم

والغير لو له خشر ووجود ** تستعمله لا بغيته يوم

**

الله خلق بالشبه عشرين ** من كل الاشكال والأجناس

بالوصف بعض البشر خشرين ** لكن ما مثلها بالناس

**

شيخين في العز والإقبال ** يأتون في كل حوليه

والكل حاضر معه رْجَال ** مثله بالاعمال والنيه

**

بعد الحيا تظهر الحلوه ** فستانها أحمر الهندام

مثل العروسات في الجلوه ** وتروح تمشي على الاقدام

**

حَيْوَان يحيا بعد ما يموت ** يالف مع الخيل دون البل

يمشي كأنه على ريموت ** مقبل ومقفي ومشيه إل

**

أحدب وفيه الشجاعة طبع ** مشهور بالعزم والإقدام

ما يشرب ألا غزير النبع ** ولا ياكل ألا لحم وعظام

**

واش بنت في الحضر والبدوان ** في عالي الضلع مرباها

بيضه وحمره وفيها الوان ** والداب الاسود تمثناها

**

اسالكم يا جموع الناس ** عن أربعه في نسبهم مين

بن باز بن صقر بن قرناس ** ورابع القوم ابن شاهين

*****

ألغاز للأطفال

تزيل راسه ويطلع راس ** كل المدارس تحيي به

لجله رجل بَيَّض القرطاس ** ملزوم تنصاه وتجيبه

**

له قلت اجبني بدون انكار ** لما لقته على دربي

صحيح إنك رجل مكار ** قلي خلقني كذا رب

**

حمره وبيضه وفيها سود ** كمان فيها رماديه

وان حل سهم القضا مرصود ** في جريها غير عاديه

**

قلت الرجاجيل والصبيان ** حطوا عليك الغباوة وسم

هز الذنب واطلق الآذان ** وقال لايق علي الإسم

**

اللغز هذا الذي ياتيك ** موروث من عهدنا السابق

طفله صغيره لكن تكسيك ** ثوبك ناسبك ويطابق

**

اللغز هذا أساسه من ** جيل البساطات والنيه

تبكيك طفله صغيرت سن ** لو كنت تمشي بحنيه

**

تلقاه بين البيوت يعيش ** يمشي وفيه الذنب يومي

جنسيته من ذوات الريش ** لكن قالوا له الرومي

**

تسرح قبل ما يطير الطير ** لكنها بدربها تحتاس

ما تاصل الماد غير عصير ** فيها المثل يضربون الناس

**

انشدك يا صاحبي عن شي ** قالوه أهل الفكر قدام

وش شي ميت ويمسك حي ** ياتيه يمشي على الأقدام

**

ياكل مروح وياكل جاي ** كأنه العامل الغشاش

يدك معه وانت حط الزاد ** هذي حياته علها عاش

**

اللغز هذا قديم الساس ** بين المجالس يشيعونه

وش شي معروف بين الناس ** بعد العصر ما يبيعونه

**

هو ابن عم الرطب له جار ** ذوب العسل في عناقيده

لما عجز ذلك المكار ** يقول حامض ولا اريده

**

الحق ناطق على فمه ** لما العدو قال جيم وسين

مولود في المهد عند امه ** رمز الطهاره وذات الدين

**

وش هو رجل بالسما مشبوح ** رجلين عنده وله يدين

لا راس عنده ولا له روح ** لكن ريقه مفيد وزين

**

وش رجل سابق معك باليد ** في ظلمة الليل لك خدام

بنتين خلفه مصادر مد ** واخرى صغيره معه قدام

**

وش جيش موذي ولبسه سود ** كأنهم لابسين حداد

حتى مع العيد يوم يعود ** يوم العرب في فرح واعاد

**

قلعه بساحة قتال تقام ** وزيرها والملك معها

جنديها خطوته قدام ** وحصان والفيل تتبعها

**

اخوات في حرب ماهن سلم ** والأخ يأخذ ويعطيها

والحمره اللي عليها العلم ** بيضه وسوده تغطيها

**

وش هو رجل أخضر الألوان ** في أسفله بنطلون احمر

لا مات تلقى لباسه بان ** لكن من بعد ما أثمر

**

وش هو رجل واقعه رَجْلَان ** من عادته يلتقي بالنص

واللي يجي بينهم ما بين ** قصوه من حيث يدخل قص

****