ألغاز

ألغاز

اللغز مرسول لك بالفكس ** والحل هاته لنا ذلوان

وارد مصدر وصادر عكس ** هذا الذي قالوا البدوان

**

أنا بأول هذاك الشي ** وفي آخره فيه غيري ناس

من قرص موجود جوف المي ** تاكل وتشرب منه بالكاس

**

أبغاك تشرح لي الأبيات ** موهوب من خمس موهوبه

يلفي مصبح وقبل يبات ** والخمسه أنواع محلوبه

**

باسألك وانشدك يا مستر ** عن آنسه في الدلع والتيه

العين من شوفها تستر ** يسعد بها حظ من تأتيه

**

هن اربعين ومعاهن تسع ** ثلاثه أقسام سوتهن

وحده خذت في البدايه سبع ** وفي باقي القسم ساوتهن

**

كثير بسمه لكنه غير ** رب البشر بالفضل خصه

لا جيت ركن الهدى والخير ** حط النظر من تحت نصه

**

سؤال عن أمهاتي هام ** وقلت بعد التسع ثنتين

بالخاص بالعام بالإسلام ** عليك تفسيرهن يا زين

**

من رقم عشره لحد اثنين ** قسم عليها عدد واجد

تلقى المقسَّم بقي له دين ** ناقص عن المقتسم واحد

**

ثمانيه مثلها ترديد ** قدام والا تجي بالخلف

فيها تصرف مثل ما تريد ** حتى تجي بالنهايه ألف

**

وش هو عدد لا ضربته في ** من رقم تسعه لرقم اثنين

من ناتجه يوم ما يصفي ** اجمع تشوف الرقم بالعين

**

أضرب رقم ضرب في مثله ** والا اجمعه مع مثيله قود

تلقى الذي صار في حثله ** مبلغ محدد وما له زود

**

رجال والناس لا جاته ** يحكم عدل بين كل الناس

والحكم في يد زوجاته ** ثنتين دايم معه جلاس

**

طاير بكل اتجاه يطير ** له ريش تدمي جراحاته

ريشه على الوكر له تأثير ** ما يرافقه في جناحاته

**

رجال ينفعك بفعوله ** عند الطلب ساعة الحاجات

وسط الوطن عرض مع طوله ** عنك يتنحى وأخته جات

**

وش بنت تمشي معك أحيان ** عشره حرسها بجنب الباب

تنام وتقوم بإطمئنان ** ما دام ما شافهم حَسَّاب

**

رجال جالس بجنب الباب ** صامت على طول أيامه

لكن يرسل لهم إنذار ** لا لامسه شخص بإبهامه