منوعات ( كسرات - خبيتي - موال )

نص خبيتي

دق النجر ويزوع قلبي من الروع=ذكرت دق نجورهم في العصاري

اللي عصوا قلبي وقلبي لهم طوع=واليوم بعد الهجْر زادوا حصاري

**

موال قديم

زمان يا حبايب أنا ما ذقت حلواكم=عطشان ميت ظما ما شْربت من ماكم

***

كسرات

بعت الهوى واشتريت اللي=يغني عن الحب في حالي

في راحة القلب متسلي=ما يخطر الحب في بالي

**

ما قط انا الحب حاربته=دايم معه في سلام وسلم

واذا ابتعد قمت قربته=واليوم حكمه عليه ظلم

**

يا حب لا تقتل الشيبان=عطنى أمل بعد سن الياس

لا تردني في الهوى خيبان=وارجع معنى ومحني الراس

**

البارح الحب صالحني=اللي يحبه جميع القوم

وقام بالزاد مالحني=حلمت به في لذيذ النوم

**

قلبي بذكر الهوى ملتاث=ما طاح مره من لساني

اللي بكل العواطف عاث=وانا من الناس ينساني

**

لما ابعد الحب في ساعة=وروَّح وعيا علي يعود

قدم لي السمع والطاعة=ورجعت معاه الليالي سعود

**

يا رب عفوك لنا ورضاك=هم عندنا غاية المأمول

عفوك لنا ربنا واغضاك=عن ذنبنا بالرضا مشمول

**

ترسل وساطات لاصحابي=من شان يرجع زمان الود

ما دام نور الهوى خابي=في داخلي ناظري ما يلد

**

دمع التماسيح عندي أصدق=من دمع يجريه بعض الناس

لو كان بي الخطر أحدق=وحشتك عندي هي الإيناس

**

موضوع تافه ولا يخطر=بالبال مره دوام الدوم

لو كان قلبك دما يقطر=قلبي أنا في غطيط النوم

**

صباحك الفل والكادي=والمسك والورد والريحان

مثل القمر بالسما بادي=لما طلع والملاقى حان

**

الكل غنى على ليلاه=وانا أغني بموالي

أحيان أعزف لحن ويلاه=واحيان يا الله يا والي

**

قلبي إذا ما انحرف عن شخص=ما عاد يرجع لميدانه

واللي سبق باعنا بالرخص=ما هو أنا ، موقفه دانه

**

هيا استمع للكلام الهام=معزوف بالناي والأرقول

اليوم قلبي من الأوهام=خالي ومثل الطبق مصقول

**

أنا أجازي بفعل الخير=لكن بالشر ما اجازي

طبعي كذا في نظام السير=دايم مع الناس متوازي

**

سلمي ذهب في الهوى مسبوك=إن كان سلم البعض زايف

هناك ربك بمن حبوك=وانته بهم في الهوى رايف

**

قدَّم لي الزين بسبوسه=وقلِّي تفضل وخذ ما شيت

وقلت لو كان بس بوسه=أسرعت يمَّك وعندك جيت

**

شفايفك طعمها من موز=بالظن ما ذقتها والله

واناملك لونها من لوز=أشوف انا لونها ما احلاه 

***

كسرات

القلب خالي من السكان=والبال خالي من التفكير

لا اقول في الحب كان وكان=وانام واصحى وانا بكير

**

أعيذكم يا تلاميذي=أولاد والا بنات الكبد

من زلة ابليس تعويذي=اللي يترصد خطا للعبد

**

يا قلب يكفيك ما صابك=خلك عن الحب في عزله

لو جيت تستعرض حْسابك=تلقى مصايبك به جزله

**

صلوا على المصطفى الهادي=اللي هدى الناس للإسلام

كلمات يحدى بها الحادي=دايم تردد لها الأقلام

**

لما العنب جاد في وقته=لو جيت من جنب زرعه مار

حلفت بالله ما ذقته=ولا ذقت غيره من الأثمار

**

الحب ترياق للعشاق=يطفي ألم في  عواطفهم

صحيح إنه صعيب وشاق=لكن يرجع يلاطفهم

**

بالبعد دارت لنا أفكار=وانا وحبي تراهنا

وقلوبنا تعكن الأفكار=ولا هان حبي ولا هنا

**

أنبش حكايات بالأرشيف=أتحف بها سمع جمهوري

ماضي سلف بالنظر ماشيف=ما اظهرتها يوم بظهوري

****

كسرات

غاب القمر في سحابه غاب=ولما انكشف زادت انواره

نور جميع الفلا والغاب=في كل ميدان له زاره

**

حب النبي للعباد شعار=في شرع من هم يحبونه

خذها نصيحه بدون اسعار=ذا أمر ربي يلبونه

**

صوت المأذن إذا ما عاد=داعي إلى الخير يهدينا

ما عاد باقي لنا مقعاد=نلقى الذي في أيادينا

**

حاضر مزجته مع الماضي=شريط من ذكريات الأمس

وانا بأمر القدر راضي=ما دام ما هو بحكم الخمس

**

البارح النوم ما جاني=حاولت عيني وهي عيت

منظر شغلني وشاجاني=مرت بجنبي ولي حيت

***

نص خبيتي

النص الخبيتي يقول في النهاية وانا أقول في البداية :

يا سيدي اسمع خطبتي المنبريه=وسهيف الخدين أبو العنبرية