كسرات وألغاز 2 / 2 / 1438هـ

كسرة

مكه لها تعترض كافر=بالله يا مسخ من إيران

وتقول ربي لنا غافر=بكره تواجه لظى النيران

***

ألغاز

 

وش بنت بالفجر مذكوره=أمثالها ما خلق بالكون

اخبار بالذكر مخبوره=ثمود مع عاد مع فرعون

***

من شام حتى الحجاز تقوم=حتى عسير الجنوبية

متشابكة مثل شبك رقوم=والا الحروف الهجائية

**

وش بنت باعلى أثر بالهند=لاخوانها تكن ماويه

متعاليه في تحدي وعِنْد=فوق التخوم السماويه

**

الشعر والحمر والملحات=عند الذي مثلها يقنون

واحيان تنشاف بالساحات=واللي يشوفونها يهنون

**

مواسمه دوم معروفه=عند الذي يحسبون حساب

يرحل بآلاف مألوفه=عب الفريزر لعند الباب

**

حرفين من لهجة العربان=ما بينها إنجليزي حرف

من حولها دمغة اليابان=دايم نناظر لها بالطرف

**

سألت واحد عياله كم=ويقول عشره ومعها اثنين

سألت وش جنسهم يا عم=ويقول من كل طيِّب زين

**

يقولون في القديم بيري طويل وفي قاعته مروه ، وأقول أنا وعليكم الحل :

هيا اسمعوا لغزهم مني=موروثنا يعتبر ثروه

طويل بيري حسب ظني=وفي قاعته تنوجد مروه

****