كسرة وألغاز للكبار والصغار

كسرة

وظيفة الشعر تارسها ** فصحى وكسره مع الشعبي

كني أبو زيد فارسها ** واذياب ابن غانم الزعبي

**

أقولها والثقة تزداد ** بالنفس في الشعر والتلوين

فارس كما طارق ابن زياد ** في الشعر والا صلاح الدين

*****

ألغاز

وش عاصمه ماشيه في السر ** ما اقول لك عن جهتها وين

بالإسم هي في النسب لك قرب ** أخوان ابوك الرجال اثنين

**

من سبع دُرات بالديره ** هي وحدها بس تسوى ألف

إحنا وهم في البلد جيره ** نسبة عرب بعد دين وولف

**

أمس البدايه لها قدام ** تر السهم والعيون تشوف

أما النهايه زمنها دام ** هي عاصمه واسمها معروف

**

ثلاثه مرات ينتظرون ** في العام وقته ثلاث ليال

يكون والا معه ما يكون ** شهره ويومه وتسع لحال

**

وش أم في البطن منها بنت ** والأم أبوها تشيله أم

تحتاجها دوم مهما كنت ** مثل الحلاوه تجي في الفم

**

خمسه مواليد ذيك الأم ** طول الزمن طبعهم وِقَّيْف

وتضمهم في حشاها ضم ** وقت الأكل يطعمون الضيف

**

وش هو بلد صارت نصفه دم ** ما سال نقطه منه في الأرض

والنصف الآخر طلع من أم ** ما شافها قط طول وعرض

**

نطفة حلو جات في المالح ** والا رمل أو طفيلي حل

في جوف واعقب خلف صالح ** هي بنت تبهج عيون الكل

**

سبحان رب الخلايق جل ** ينجي الذي يعبده من نار

شوف القوافي تراها حل ** والإسم زهره من الأزهار

**

واحد يوديك لا جده ** وثنين تنقلك للأقطار

محسوب بالوقت والمده ** جالس لحالك وهو بك طار

**

عشره رجاجيل يحكمهم ** صغيرهم لا أتى من خلف

وفي وسطهم ما يكلمهم ** يدخل معاهم وما هو صلف

**

قبل الفجر قال لي إسمه ** اللي جلبني بسحره جلب

وقلت هذا بحر رسمه ** لو تقلب السين بالبا قلب

**

الأربعين ان بلغ راعيه ** يحضر ويكمل لإخوانه

رجال عاقل وعقله فيه ** له جد واثنين أبوانه

**

رحال يحكم على جبار ** ما يلمسه لمس بزنوده

يرسل أشعة من الأنوار ** رايح وراجع بها يقوده

**

بالأرض راسي وفيه شموخ ** واقت الشتا أبيض العمه

بالهند واحد غدا مطنوخ ** زايد عن الكل بالقمه

**

رجال دغري بدربه بحت ** ما يلف يم اليمن والشام

يطلع لأعلى وينزل تحت ** ما يروح آخر ولا قدام

**

تشوفها شوف بالعينين ** وأحسن لا صار الهوا قَرَّه

وان كنت جاهل لها يا زين ** إسأل رجل من بني مُرَّه

**

وش هو إبن دايم تدوسه ** وتدوس بعده على أمه

تلقاه في وسطها مدسوس ** وتحط رجليك في فمه

**

تلقى اللظى فوقها مسجور ** والمي في جوفها محبوس

طويلة القد والحنجور ** واصحابها تحبها وتبوس

**

العين ثانيه والخامس ** والنون أول وثالث فيه

وان كان تبغاه وتلامس ** حله ألف رابعه يوفيه

**

رجال نشمي قوي الناب ** والناس يخشون من باسه

واذا انحرف عن طريقه شاب ** والشعر ما طب في راسه

**

واحد وجابوا له العشره ** وكان يكفي عن الباقين

رْجَال برياض منتشره ** وباقي المناطق لها ثانين

*****

ألغاز للأطفال

وش بنت والبحر مصدرها ** ومن شان يا طفل ما تحتار

حنا من السوق نحضرها ** لا هي بحوته ولا هي مْحار

**

أرنب ومتفرشه رجلين ** ومتلحفة باليدين الحاف

وتشوفها نايمه بالعين ** من شافها قال يا رواف

**

من أربع حروف مجموعه ** نصفه يصنف مع الزهرات

من ياكله سَيَّل دموعه ** لو حط له ملح وابهارات

**

له درع فوق الجسم ثابت ** يدخل بجواه حين يخاف

كالشوك فوق الشجر نابت ** قدام وقت القمر ينشاف

**

علامة السلم ما هي حرب ** يقرن معاها غصن زيتون

وتشوفها في سماها سرب ** ولا عليها تميل غصون

**

سبحان رب الملا فينا ** سبحانه الله علينا اكبر

في كل أسبوع تأتينا ** سنه على صاحب المنبر

**

باسبانيا شفت حرب الروس ** واحد رجل كان سايقهم

وسلاحهم مثل حد الموس ** واللون الاحمر يضايقهم

**

هاتف وأغلى من الهاتف ** واغلى من الهاتف الجوال

وابوك أول لها ناتف ** لا جوه يشكونك الأطفال

**

رجلينها كنها المنشار ** وعيونها مِنَّها فيها

تنزل على الزرع مثل النار ** وعيالها سرب قافيها

**

وش ناس بالسبت يهتمون ** به صيدهم كان في الماضي

في ذلك اليوم يلتمون ** مشغولهم والذي فاضي

**

اللوح قام اشتكى رسمي ** ويقول سببت لي أضرار

قال الضرر مس لي جسمي ** واصبحت من وسط جسمك مار

*****