كسرات وقصائد

كسرات وقصائد

زاوية بين الماضي والحاضر

من حوت نبغى لنا ربعه ([1])**ناشف بجنب الرطب يزدان

والله جعل فوقنا سبعه**ومن تحتنا مثلها قد كان

واحد ضرب صاحبه شبعه ([2])**زميل مثله من الورعان

بسكوت جانا أبو طبعه ([3])**لا جيت تشري من الدكان

والطير له بالنخل قبعه ([4])**لا طب وسط النخل ظميان

أخوي ما شفت له كبعه ([5]) **لا جيت له أطلبه طفران

***

بديهيات

كثر الحكي ينحسب دوشه ([6])**من شخص دايم طويل لسان

يقال لا تروح في الطوشه ([7])**إذا نزل شخص بالميدان

حليه قزازه هي الغوشه ([8])**وتحط بالزند للنسوان

ترى المخاصم هو الهوشه ([9]) **ما بين إنسان مع إنسان

بديهيات

مخيط مع الميبره وابره ([10])**تخيط الاغراض عال ودون

واللي مجرب وله خبره ([11])**في بعض ما كان والا يكون

والمقتصد قيل له دبره ([12])**في كل مصروف أو مخزون

ومن الدوا كانت الصبره ([13])**وتحط بخشوم والا بطون

***

كسرات

ممالكه حازها باليد ** بالظلم والعسف والإجبار

جميع مستعمرات الود ** فيها البلا والخطر والنار

**

صدرك وجوزين به شالع ** قميصك اللي يدفيهم

وضغط الحرارة بهم والع ** يحرق لمن هو نظر فيهم

**

واحد سأل في الهوى جمهور ** من جرب الحب من ذاقه

في عَوْد ماشي على باكور ** جاوب بزفره من اعماقه

**

اللي كما النحل يعمل قرص ** يخفيه عن نظرة الأعيان

واللي يقرب جزاه القرص ** لكن كما قرصة الديبان

**

لما تخاصمت انا والود ** حط الأمور الردية في

اللي مساويه ما تنعد ** منها الذي بان والمخفي

**

باعطيك انا من علومي درس ** ينفعك في اليوم والآتي

في الحب ما كنت أنا كمبارس ** دوري البطل في حكاياتي

**

وجهك كأنه صخر منحوت ** لا جات للناس بك حاجة

وكنه غسل من مرق للحوت ** لما لحاجتك تتواجه

**

أمس الهوى مر بي يزحف ** زحمه معه عاملين حصار

قلي انت موضعك في المتحف ** محسوب من جملة الآثار

**

من يشتري الحب

من يشتري الحب بالجمله**والا إذا حب قطاعي

الحب ما عاد له عمله**وبالسوق ما عاد ينباعي

**

البيات الشتوي

حل الشتا والبيات يحل**وحنا كما الناس نبغى نبات

والمنتدى لا خِلِي من كل**قولوا مرض لا تقولوا مات

*****

---

([1]) ربعه : نصف سمكه ناشفه .

([2]) شبعه : دون سبب .

([3]) طبعه : علبه من صفيح كانت يغلف بها البسكوت .

([4]) قبعه : ضربه بالعصا .

([5]) كبعه : ما ردني خائباً في يوم .

([6]) دوشه : كلام كثير .

([7]) الطوشه : لا تضيع في وسط المعركه .

([8]) الغوشه : حليه ملونه من الزجاج يلبسها النساء .

([9]) الهوشه : التسان والخصام .

([10]) المخيط والميبره والإبره : من أدوات الخياطه .

([11]) الخبره : المعرفه والدرايه .

([12]) الدبره : الاقتصاد والتدبير .

([13]) الصبره : من الأدويه القديمة التي يؤتى بها من عند العطار .