قصائد وكسرات

قصائد وكسرات

زاوية بين الماضي والحاضر

طلع النخل آخره جبه**إذا اكتمل ساير القنوان

واكل العنب لذته حبه**مثل الذي قالوا الأخوان

والأرض فيها ترى دبه**مذكور في غزوة الفرقان

نبغى نسوي لكم شبه**يقولها عازم الضيفان

وعند البنا ليلة الصبه**جهز ذبيحتك يا بو فْلان

والباب نصنع له الضبه**يوم العرب تقفل البيبان

والثوب في داخله قبه**من نفس الاشكال والألوان

يوم المره تلبس اللبه**معها المشنشل مع الخرصان

***

بديهيات

راعي الجمل يرفع الحمله**وبعض الجماميل ما تشبع

ما يخاف لا جاته الرمله**وزمالته تخبط الأربع

رجال في قلبه الصمله**واللي يجي بالعصا يقبع

واللي عمل بالبلد عمله**يشرد ومن يطلبه يتبع

خطه كما خطة النمله**تقرص ولو كان بالأصبع

والراس أول وبه قمله**لو كان شعره طويل اجبع

***

رسم المثل

رسمت انا بالمثل قاله**مثل الذي يرسمون القيل

اشرح بضرب المثل حاله**ما بين ماضي وحاضر جيل

كما من رجل كنه الآله**يحوله صاحبه تحويل

وكم من رجل يملأ الصاله**هرجه بلا فايده ويطيل

وكم شخص من حوله الهاله**سووا له اصحابه التطبيل

في مدته ما كسب طاله**والناس له بالمديح تكيل

لا بورك الخال والخاله**اللي لهم ينتمي لا سيل

***

بديهيات

اللي حصل للغنم بروه**يجيب عامل من العمال

واللي من المال له ثروه**يصير تاجر وعنده مال

واللي ببيته ربط جروه**أو جرو تحرس له المنزال

خذ لك بفصل الشتا فروه**لا هل وبل الحيا هطال

وادفع لراعي الجمل كروه**إذا طلب حقه الجمال

ترى الحجر ينحسب مروه**لا صار أبيض كما الفنجال

***

كسرات

شاعر وشعرور

صار الشعر يشتكي مقهور**تشكي قوافيه واوزانه

مع كل شاعر طلع شعرور**يفسد من الشعر ما زانه

**

الوصل والهجر

ترى الوصل والهجر قانون**للحب بين العرب والروم

كيِّف ظروفك على ما يكون**لا تعيش عمرك شقي محروم

**

حب الزواج

تسعه وتسعين حالة حب**هي فاشله تنتهي ما تدوم

والواحد اللي حلاه الرب**حب الزواج الذي معلوم

**

بوصلة الحب

لا تحولي بوصلة حبك**عن وجهة الحب عني تحول

ما دام جاب الهوى ربك**انتي وانا ناخذه بقبول

**

حرب البسوس

حرب البسوس القديمه جات**أقوى وفوق اربعين تدوم

الكره جنب الحسد موجات**والكل فيها غدا قيدوم

**

تمثال الحسن

لو رشحوا للحسن تمثال**طلعت من نسختك صوره

القد مثل الغصن مياس**والخد مثل الأباجوره

**

السمع والطاعه

انتي وبدر السما والشمس**ثلاثه انوار سطَّاعه

  وابصم على جبهتك بالخمس**واقدم السمع والطاعة

**

معنى الحب

انتي وانا من جعلنا الحب**بين المخاليق له معناه

ياكم شبه وكم من شب**جا يشتري بس ما بعناه

**

ترسانة حب

ملكت في الحب ترسانه**أعيش ما بينهن واختار

يا كم حبيت إنسانه**واليوم صار الهوى تذكار

******