كسرات حديثة 3

القرش

احذر ترى لا يجي لك قرش**يلي بجوف البحر عايم

تحت البحر ينخرش لك خرش**يترك بجسمك أثر دايم

**

سبع المثاني

تزاحمت في عيوني سبع**سبع المثاني من القرآن

للمغفرة والهداية نبع**اللي لدين الهدى برهان

**

حنش وداب

قلت الحنش قال هو الداب**قلت الإسم والفعل واحد

بس احذره ان حضر وغاب**قرصه توديك للاحد

**

حمام الأيك

لما سباني حمام الأيك**اللي يغني على شيرته

كتبت عمري بداخل شيك**وقمت للزين جيرته

**

الباب مقفول

لقيتها منشغل بالي**قالت علامك كذا  مشغول

قلت الذي مثلكم غالي**بابه عليِّه غدا مقفول

**

حكم النساء

دايم يسون عمايلهن**طبع النسا طبع متقلب

لو الرجل كان عايلهن**هن حكمهن دوم متغلب

**

المشككه

قالت وهو يستمع ذاهل**والكون كله بعينه هان

للحب ما اظن تستاهل**واعطيك من عندي البرهان

**

في اليانصيب الحظوظ تقوم ** والحظ في ضربة الترجيح

أما العمل شغل بالقدوم ** يا اللي من الحظ دوم تصيح

**

أشر بعينه اشارة غنج ** شد انتباهي بتأشيره

مثل المخدر بأبرة بنج ** غديت من سحر تأثيره

**

بعض العرب صحبته رسمال ** والبعض مثل الذهب صافي

والبعض ما ينشرى بريال ** ومن صحبة البعض يا كافي

**

قال الهوى قل مجهودي ** وتغير أهل الهوى بالذات

كنت اقتل الناس بزنودي ** واليوم ما عمر عاشق مات

**

الكل يلهج بذكر الحب ** وينوح في الحب ويغني

واحلى هوى لاعطاه الرب ** زوجة بها الزوج متهني

**

كل الهوى يا جماعة كذب ** نكذب على الناس وانفسنا

ونزينه بالكلام العذب ** عند الحكي في مجالسنا

**

قامت بضبط الهوى حمله ** لقيت تجاوز يهد الحيل

أغلاط بالفرد والجملة ** باليوم غير الذي بالليل

**

فاق البكا حد منسوبه ** اللي حدوده على الخدين

حتى مزج طعم مشروبه ** وصار يشرب دموع العين

**

لا تقول ارجوك بس امر ** وانا تحت اهبة التنفيذ

قلبي عليه الفرح غامر ** كنه بحفله فرح تلميذ

**

اللي مسوي الهوى حرفه ** وبالقلب عشره حسب دعواه

لك قلب والا معك غرفه ** قال الصديق الذي ينهاه

**

تسعة وتسعين في الميه ** من واقعات الهوى تخريف

وواحد إذا صفيت النيه ** يخش في خانة التصنيف

**

زواية على الماضي

كتبت همزة على النبرة**من شرح تاريخنا المنقوش

سالت على عيني العبره**والخد من عبرتي مرشوش

بالله يابنت يا جبره**هاتي من الجيب لي قْروش

ليلة شتا بردها صبره**تبغي تمر مع سمن منشوش

بالليل لاهبت الغبره**بالخبت والا على مغشوش

والسوق فيه اللحم هبره**حَرِّي وما هو لحم مغشوش

زاوية على الماضي

يا اخوان حطوا لنا ( قطه )**باغين رحله إلى الشلال

واللي يبا يغط له ( غطه )**وانجهز أغراضنا في الحال

واحد وضع في الأكل شطه**وواحد جلس يشرب الفنجال

ونصيد ( صفري ) مع البطه**والقمري اللي يجي أجوال

وطيور تسمع لها ( وطه )**من صوتها يفرح الأطفال

والباب لا عط له ( عطه )**نقول مرحب هلا يا رجال

**

زاوية على الماضي

بالحلق ذكرى لها ( غصه) **تاريخ من مدة الجدان

بالصيت يم النخل بصه**قدام شمس النهار تبان

والطير له بالنخل ( وصه )**من نومته ساعته يقظان

ليمون بالفم له ( مصه )**يزرع مع الموز والرمان

ومن الشِّعل شلت لي ( رصه )**نبغى نولع بها النيران

وجيت واقف على ( القصه )**واطرق على الباب باستئذان

****