كسرات 30 / 4 / 1438هـ

كسرات

إبعد عن الشك والشبهات=لا تقترب ذاك والا ذيك

شيطان في ساير الجبهات=يبغى بكل السبل يوذيك

**

عيون فيها العيون تتوه=وعيون تاهت لواحظها

خلتني امسي كما المعتوه= من كثر ماني ألحظها

**

تعانقت في الهوى رمشين=هذا مغمض وذا مفتوح

مثل العصافير في عشين=تبعد ويجمع هواها روح

**

أحلى من الشهد والسكر=لا قدمه في أباريقه

وللي نهل كوثره سَكَّر=هذا الحلو والحلو ريقه

**

اللي هجر في الهوى وانحى=وصار عني بعيد الدار

يا ليتني يوم ما أصحى=وانه بجانب فراشي مار

**

قرر وقررت واجمعنا=نقطع علاقاتنا بالحال

لكن لما توادعنا=شفنا سوا ان الفراق محال

**

مر الزمن مسرع الخطوات=وايام تسرع بممشاها

واثر بكل البشر سطوات=بالقلب والعين واحشاها

**

بعت الهوى من زمان العام=لاول مزايد حضر يشريه

واليوم جاني ومرخي الهام=بلاش من ذمته يبريه

**

هات القماري على الغزلان=حتى الحمام الذي يدرج

واكسب جمال الزمن لالان=بناتنا يلعبن حدرج ([1])

**

سمعت بالليل اكثر صوت=في عهدنا اللي مضى قدام

من ناس خيم عليها الموت=أيام نمشي على الأقدام

***

---

([1]) حدرج : لعبة للبنات يجلسن على الأرض وكل واحدة تضع يدها مبسوطة على الأرض وواحد تضع معهن يد واحد الثانية تعمل بها وتمر على كل يد للبنات وهي تقول : حدرج مدرج شيخ الذبان جانا يدرج باغي الجنة واخطا في النار ، والتي تقع الكلمة الأخيرة على يدها تقرصها بيدها وترفع يدها واليد التي تجلس آخر الأيادي وحدها تعتبر صاحبتها مغلوبة ، ثم تعاد اللعبة مرة ثانية وثالثة ورابعة .