كسرات - مفرج السيد

وقتك مضى يالمؤمل راح=زمان ما عاد تطري لي

من يوم سابتني الأفراح=ودمعي يبلل مناديلي

**

ناديت ما كلمتني دوم=وقلت هذا أمر عادي

ولما أنا كل متني يوم=نادت وانا صرت ما اندي

**

الحب معاي سْباق=خزينته فارغه من مال

وانا منه غاسل الأطباق=اللي من أول معي همال

**

راعي الهوى من وجودي غاب=اللي من اول يوافيني

ويا اللي لبس للغرام ثياب=مقصدك ما هو بخافيني

**

من يوم أنا ما كبر سني=أصبحت انا في الهوى منكور

جاني الهوى يعتذر مني=وقال يا صاحبي مشكور

**

بحر الهوى زاخر الأعماق=ما يقطعه كل من طَبه

يا ما زخر واغرق الآماق=وصاحبه ما لقى طِبه

**

خرجت من موسم الألغاز=ودخلت في موسم الكسرة

بنزين هذا وهذا غاز=وكلهم ويل مع حسره

**

والله يا جاتني صدمه=وانا على الدرب وحدي أسير

بالوجه حصلت لي كدمه=وبالكتف حصلت لي تكسير

**

يا حب دوبك علي يا حب=ضاقت معك كل حيلاتي

من يوم انا في حياتي شب=وانا معك طول ليلاتي

**

يكفي كفى كف يا رمشي=حتى وانا في طريقي مار

حتى وانا بالطريق امشي=تطلع على دربي الأقمار

**

واحد قمر بالسما طالع=وبالأرض واحد قمر سيار

والجو ما بينهم والع=وانا يجاذبني التيار

**

زمان وانا عن الكسرات=مبعد كأني لها هاجر

واليوم حلت لي العسرات=وما عاد في بيننا حاجر

**

عايش على ذكريات الأمس=كني شبح في الهوى عايش

تصبح وتمسي علي الشمس=والراس فيه الفكر شايش

**

على الهدى نتفق دايم=ونجتمع في حدود الدين

والود ما بيننا قايم=وفي طاعة الله مشتدين

**

شمس الضحى يوم لاحت لي=وانا على وجهتي غافل

ما اظنها قاصده قتلي=لما اظهرت حسنها الحافل

**

ما فيه بين البشر كامل=ونصيب مره ونخطي السير

ويا الله من فضلك الشامل=تسبل علينا الستر والخير

**

صوت البلابل ذهب مني=وصوت الغرابين ينعق لي

يا الله وش مقصده مني=أقولها صدق من عقلي

**

يا ما اسعدتنا الليالي البيض=ويا ما على سودها عشنا

تعطي وتاخذ عنه تعويض=تونس وأحيانا توحشنا

**

نسيت كل الليالي اللي=راحت بعمري سدى قدام

اللي إذا ما هجر خلي=أروح له حافي الأقدام

**

يا الله يا من طريقك خير=وطاعتك بالعنق لي واجب

أدعوك ومن الضحى وعصير=تجعل من الشر لي حاجب