ألغاز

ألغاز

أربع ركايب ومعقوله ** وكل ثنتين تنطح بعض

بالجو والأرض منقوله ** في كل الأقطار طول وعرض

**

أنثى ومن مثلها تحمل ** من دبرة الواحد المعبود

وبحملها يوم ما تكمل ** وتنبشر الناس بالمولود

**

إن كنت في شك لساعك ** في الصاحب اللي معك صادق

قم شدها شد بذراعك ** ولسانها بالوفا ناطق

الحل : المقصود باللغز الساعة فهي لا تخون صاحبها ، وقد حله صديقي الشاعر طلال بن ناجي الصبحي البندقية وهو حل صحيح ومعقول ومقبول ، وشكراص له على حسن تجاوبه .

وانا أقول في الحل :

عن حلها نكشف قناعك ** إن كنت في حلها غارق

الساعه اللي على باعك ** ما تخادع الناس وتنافق

**

اسمه مهند وله أخوات ** ثلاث في العمر بالترتيب

في الناس يا كم له صولات ** وحزام هن مع شباب وشيب

**

جاني البصل يشتكي منها ** وقال ذي جات في القرآن

لكن انا صرت ما امنها **  في الوقت غاراتها والآن

**

اسمه مسافه وشيل اتلاه ** وشيل اوله واترك الباقي

واذهب بعكس الجهه تلقاه ** تراه في مهنة الشاقي

**

بالصوم فعل الأمر مجزوم ** والصوم بالفعل في الماضي

رجال وقت اللزوم يزوم ** حكمه إذا ما حكم قاضي

**

بالكهربه بس واحد فاز ** مرهم يزيد النعومه لين

شوف القوافي تراها انجاز **وضم الأوايل على التالين

**

الحب لهل المحبه سم ** ولصاحبه للأجل به سار

رجال يا كم باع وكم ** بالسوق يذهب يمين يسار

**

واحد حكم والشهود جلوس ** لكن صن الذي قبله

أربع ميه كسرت للروس ** وواحد عليه انقلب دبله

**

ناديت والرد قالت سم ** والسين معها سواسيَّه

آله وفنانها قسم ** وحروفها الباقيه ميَّه

**

دمع الهوى حلو والا مر ** على خدود المولع سال

والقافيه للحلول تجر ** تخبرك بالحل قبل تسال

**

إذا لسع بطنك اللاسع ** راجع طبيبك وناجي الرب

يشفيك من فضله الواسع ** وبعكس أول فعل لك طب

**

هذا صقر ما يصيدونه ** ولا يطير في طولها والعرض

في يوم لا صوب عيونه ** فريسته صادها بالأرض

**

رجال ويبث للأنوار ** في اليوم خمسه من مرات

وفي يوم سابع بست مرار ** ويعيدها في الشهر كرات

**

رجالنا كان في الماضي ** يضرب وينشد على الطبله

ما كان هذا العمل فاضي ** يبغى يصحيك يا أبله

**

قام المطوع بتصويته ** اللي يؤديه بالأوقات

معروف بين العرب صيته ** بالأرض من خيفته ما يبات

**

عذره وفي بطنها عذرات ** وكل عذره بمولوده

ألوان واشكال مختلفات ** والبنت بيضه ومفروده

**

وش هي بنيه لها نحتاج ** والبيت معها مسوي ولف

تمشي على القز والديباج ** وتجر رجالها بالخلف

**

بانشدك واسألك عن عذره ** لو ما انجبت يحسب المولود

واذا انجبت وانتجت بذره ** عشره ولدها وزود تزود

**

لما جهز قال خلوها ** من واقع الأمر والإنصات

والربع قاموا وشالوها ** في وسط ميدان خذها وهات

**

يقيضي الغرض أو يجي فاضي ** ويقال له عفص أو ملوط

حاضر ومعروف في الماضي ** واذا قضى حاجته مبسوط

**

يقطع من الروس ما يؤمر ** ولا ذنب عنده ولا إحراج

لا شق بين الصفوف ومر ** كنه على عهده الحجاج

**

من خمسه حروف عند الجمع ** يا اللي تِعْرَفُون للمعنى

ثلاث منها تجي في السمع ** واثنين في أول المبنى   

**

تشوفه يلوح في الأعلى ** ويميل في الريح لما تهب

طعمه كأنه عسل واحلى ** موهوب من معطيات الرب

**

رجل انجليزي وقبله سل ** الفارسي في مناسيبه

للغز هذا نريد الحل ** راجع حروفه وترتيبه

الحل : اللغز هذا حله صديقي الشاعر طلال بن ناجي الصبحي وهو الصحابي الجليل سلمان الفارسي رضي الله عنه ، وأقول أنا في الحل

على النبي في البدايه صل ** والحل نقراه ونجيبه

سلمان لما علينا هل ** الفارسي زاد في طيبه

**

كاين وماله وجود يكون ** لو كان يفرح به الإنسان

من دون يمشي معك في دون ** حتى كأنه معك ما كان

****