عنتر يخاف من عبله ..

عنتر يخاف من عبلة

 

لقيت عنتر في طريق اليمامه=راكب على حصانه وبالجنب ميال

لابس عقال يلوح فوق عمامه=متوشح بسيفه يغني بموال

معاه من كل الذخيرات لامه=درعه ورمح وقوس في وسطها نبال

والدم سايل مثل دم الحمامه=من فوق راسه للقدم دم سيال

وقلت يا عنتر عساك السلامه=من الذي يجرا على سيد الابطال

وجات عبله قايله بابتسامه=أبو الفوارس باللقا خوش رجَّال

لكن قدامي فقد طول قامه=وصار قدامي كما بعض الاطفال

وقال يا عبله أهنتي الكرامه=واما انت روِّح يا رجل واستر الحال

وقلت يا راعي الوفا والشهامه=يا فارس الفرسان من عهد الاجيال

أظن يبقى لين يوم القيامه=والرجل من انثاه في منزاله ذال

تغريدة ( 3 )

 

للشعر جاذبية وأنفاس

 

حلفت ما استجدي أنا رغبة الناس=لكني أفرضها بشعري فراضه

شعري بحر طامي وزاخر وقطاس=ما هو بحيرة أو مجرد مخاضه

فيه الأصالة من شعوري والاحساس=ومن موجة التجديد فيه انتفاضه

ترى الشعر له جاذبيه وأنفاس=ما هو مثل بعض المعاني قراضه

ولا شفت غصن البان مايل ومياس=امشي على جنبه براحه وراضه

واداعب الكوره على الرجل والراس=كني بفن الشعر راعي رياضه

والا سواة الصقر بالجو قرناس=لي بالشعر في الجو سرع انقضاضه

ترى الشعر ياتي مثل لمحة انعاس=ما بين فتح العين والإنغماضه

 

*****

يوم الوطن

يوم الوطن

 

لبست في يوم الوطن له عقالي=ولبست بشتي فوق كتفي زياده

كنه نهار العيد نوره يلالي=والعيد عيد الله له اللبس عاده

وعايدت في أول نهاره عيالي=واللي بجنبي ينتسب أصل ساده

ترى الوطن حبه على الكل غالي=واغلى التهاني للملك والقياده

آل السعود اللي لهم عز عالي=على الجزيرة محكمين السياده

وحامين بيت الله من اهل الضلالي=في خدمة البيتين نبع العباده

والشعب تحت الأمر أول وتالي=موقف رجال ويستحق الإشاده

هذا كلام من القصي والموالي=ما هو من الشاعر مجرد إشاده

وعاش الوطن من كيد الاشرار خالي=وعاش الملك في صحته والسعاده

وسلمان مع مقرن رجال المعالي=وسيوف عبد الله بعزم وجلاده

يارب تحفظهم بطول الليالي=وتجعل معاديهم بذل وقراده

والدين حبه والملك شف بالي=مثل الوطن بالجيد أغلى قلاده

حديث الأربع

حديث الأربع

 

لقيت لي من فايق الريم غزلان=لهن بوجه الأرض مسرح وميدان

جات القصيدة ساعفتني بالاوزان=بديت أوصِّفهن بشعري واغني

 

**

 

ثنتين مع ثنتين هن الولايف=هن خايفات ومثلهن كنت خايف

رحت اتوخر عن مكاني واسايف=لكنهن رجعن وقربن وجني

 

**

 

الأولة بيضا كما لون جمَّار=والا سواة الشمس ما دونها ستار

والا سوة البدر مشرق بالانوار=والعمر في العشرين في حَسْبْ ظني

 

**

 

والثانية شقرا كما لون مهره=لها نسب بين الأصايل وشهره

مثل التبر والا بنفسج بزهره=فيه البراعم بالثمر ما تقني

 

**

 

والثالثة سمرا وهيفا طويله=والخصر ضامر حول قامه نحيله

تشبه لغصن البان وسط الخميله=تذبحك في ميلاتها والتثني

 

**

 

والرابعه تفاحها فوق الاوجان=وحمر الشفايف كنها ورد الاغصان

دم الشباب بجسمها حيث ما كان=حمر الكفوف وما صبغها المحني

 

**

 

حييتهن بالشعر عذب القوافي=وعاهدتهن وانا على العهد وافي

قالن على مثلك سلام وعوافي=عسى عدوك بالهوى ما يثني

تغريدة

تغريدة

 

 

شف بالي بجلسه في وسيع الخبوت=وسط روضه تغطت بالعشب والزهر

تختلف في نواحيها فنون النبوت=حولها الما جرى صافي كأنه نهر

والنشامى بحولي لابسين البشوت=يوم فصل الشتا برده يقص الظهر

والدلال الصفر ماهي بمعدن وتوت=من تراث الأوايل من قديم الدهر

والعشا من ذبيحه أو مع الرز حوت=نصنعه من يدينا قبل نبدا السهر

نبتعد عن هموم المجتمع والبيوت=لو يطول الزمن فينا لغاية شهر

 

كسرات جديدة

كسرات جديدة

 

اسمع وهات الذي عندك=نبغى انتحاور على ما يفيد

وشد زندي على زندك=يدّين أنتج عمل من إيد

 

***

 

راعي الهوى

 

راعي الهوى في غرامه ظل=يشكي من الزاد والمشروب

زاده من المر والحنظل=والشرب من ذلك الأنبوب

 

***

 

خيمة

 

خيمه وبالخبت منصوبه=ما طب فيها حجر واسمنت

والنار بالباب مشبوبه=هاتي المعاميل لي يا بنت

 

***

 

سحابه

 

مرت سحابة بلا مطره=تِرعد وتِبرق بواديها

مخرجها بحر سومطره=لما نشت في مباديها

 

***

والله فيها الخير

 

قالت وأنهت علاقاتي=وقدام عن طرف عيني تروح

لك حظ أوفر مع الآتي=وهاردلك يا حياة الروح

 

***

 

البيع بالكاش

 

بالكاش أنا أشتري وابيع=ما ابيع بالدين والا القرض

طلعت من فوق ذاك الريع=وشفت الذي صار فوق الأرض

 

طريق الحب

طريق الحب

 

كان الهوى لي سابق الوقت منهاج=لكن انا ضيعت سابق غرامي

طفيت في دربه مصابيح وسراج=غديت ماشي في متاهة ظلامي

واهل الهوى حطوا على راسي التاج=واغلى القلايد علقت في نظامي

لكن فرق السن سوّى لي ازعاج=كل ما لقيت الحب واقف أمامي

واصبح طريقي في الهوى صعب بطناج=لو رحت ارشه من سحاب غمامي

وما شفت من أهل الهوى طب وعلاج=وقلت اختم المشوار بآخر كلامي

ويا ابو الثنايا كنها الدر والعاج=عليك من راعي المحبة سلامي

                          و يا قلبي اللي بين الاضلاع بي لاج=حان اعتزالك في هواك الختامي