كسرات 1438هـ رمضان

كسرات 

أبقى سوات الجبل شامخ=ما تهزني كثرة الضربات

واحارب الوقت واكامخ=واصحى على محاربه وابات

**

من ذكرياتي ومن نقدي=إن القوافي لهن مْهور

من يوم جددت انا عقدي=مع الشعر قبل ست شهور

**

يا ديرتي لو ترابك ديس=نفداك بالمال والأرواح

ولو كان جائز لك التقديس=نكتب قداستك بالألواح

**

يا بو العيون السهاوي وساع=والرمش يسطي بأرماحه

وانته صغير العمر لسَّاع=والصدر ما بان تفاحه

**

يا رب تجمع لهم في خير=يارب واحسن عواقبهم

عسى الهنا في مسا وعصير=يمشون في نهج شايبهم

**

ليل الشتا طال ماله صبح=ويا بخت من هو قصر ليله

وكلب البدو منه طالع نبح=ويهز للي قرب ذيله

**

يحرقني الحب في ناره=وتزيد في قلبي الآلام

يستشرق الصبح بانواره=ويلفني الليل بالأحلام

**

خاصمني الشعر وارضيته=نرضيه واحنا سلاطينه

واعطاني العقد وامضيته=في يوم غابوا شياطينه

**

ريس على دائرة تفتيش=في قسم بالشعر ماله داع

وان جيت تسأل عنه ما فيش=عنده سوى محارب الإبداع

**

كل ما ارفع العين واشلعها=أشوف بدر السما طالع

نيران بالقلب ولعها=ما كان من قبلها والع

**

ظليت انا في المحبه حر=مثل العصافير بالأغصان

من غصن أميِّل لغصن امر=والسر ما بيننا منصان

**

من آفة الشعر رواينه=اللي لهم في هواه ميول

كما غيروا من دواوينه=وحطوا لبعض البيوت ذيول

**

كسرات تنسب لراعيها=وكسرات تسلب من الشعار

والناس تشكر مساعيها=لكن بالنقص عيب وعار

**

الكسرة اللي نهندسها=ماهي مجرد حكي شعار

عروس ترفل بسندسها=في مهرها نعلي المسعار

**

العنصريه غدت عاده=يعيش فيها شراذم ناس

ما اقصد بها ناس يا ساده=لكنها من جميع اجناس

**

تر الحسد طبع في الإنسان=من يوم ما كانت الدنيه

يحسد على منطقك ولسان=ويحسد على الجسم والبنيه

الدنيا ، ممدوة ولكن القافيه حكمت أن نجعلها بالهاء والمعذرة

**

نرجع إلى الحب في وصفه=اللي فقدناه في أعوام

إعصار جبار في عصفه=تلقى ضحاياه بالأكوام

**

نام الخلي من هموم الحب=وانا مدى ليلتي ساهر

محتار وارعى نجوم الرب=سيف الهوى في يده شاهر

**

غاده وما هي من الإفرنج=لكن ترطن بكل لسان

قامت معايه تسوي غنج=مهره ومن حولها فرسان

**

دارت لنا في الهوى أفراح=ما هي كما كان سابقها

اللي جمع للعواطف راح=أفراح والحزن عابقها

**

عد يا هوى وانت لك مسموح=لو تاخذ الروح مجاني

ما عاد باقي وراك طموح =ولو جيت كل السعد جاني

**

صفحة ثريه من الكسرات=عرضتها في مدى عمري

أحيان أشكي الهوى حسرات=واحيان طاير مع القمري

**

اليوم في خاطري موضوع=من طلعة الشمس من باكر

ذكرة سوات العبير تضوع=هذا النبي يوم له ذاكر

**

مسلم وصايم واصلي الفرض=ولا اعارض الرب في شرعه

الحب لو لم يكن بالأرض=كنا على الأرض نخترعه

**

ناديتهم يوم ما مروا=رد الندا كان بالتفتيش

في سابق العهد كم سروا=من دونهم كيف انا باعيش

**

تحارب الوصل والهجران=يوم القوي ينتصر دايم

والوصل في موقعه حيران=والهجر بين البشر قايم

**

فطورنا اليوم طعميه=مع سندوتش الذي معروف

مافيه خمسين أو ميه=تحسب على خانة المصروف

**

إبليس لا قيل له ملعون=يفخر ويزداد في فخره

يلقي من الخلق فيه طعون=تبقى إلى البعث في ذخره

**

جنا البلح مال به قنوه=فوق النخل في زمان الصيف

ذكرت في حينها صنوه=اللي انغرس أوله بالخيف

**

يا مدعي في الهوى وتقول=في الحب عندي وما عندي

وفالصبح تنفض طبق من فول =و بالظهر تنسف صحن مندي

**

بالله يا هدهد الأخبار=جيب لي رساله من الغالي

فارقني الزين بالإجبار=وانا مثل ما ترى حالي

**

آنا سعودي وليه فخر=لا قالوا الناس يا سعودي

سلمان ربي يديمه ذخر=واثري الوطن دوم بجهودي

**

ما عاد باقي أمل بالناس=درهمك هو الذي يخدمك

اللي تظنه ذهب والماس=إفحص ترى معدنه يصدمك

**

يا رايح الشام انا با اوصيك=تجيب لي عازتي منها

يا اللي هنا كنت وش مقصيك=دنيا كذا كيف تامنها

**

لك كف مخضوب بالحنا=والصدر تفاح طالع فيه

والخال بالخد جننا=ريقك عسل ناهله يشفيه

**

إبليس ملعون ابو مره=أحيان تلقاه بين الناس

كم واحده ماشيه حره=أعرض لها ذلك الوسواس

**

مزنة مطر هل وابلها= منها استقى قلبي الصديان

وطيور غنت بلابلها=وسط الشجر داخل الوديان

**

خالد بطول العمر منصور=في ساحة الحق والإسلام

له في جنان النعيم قصور=موعود من ربه العلام

**

مهما صحينا ولو نمنا=ما تنام بقلوبنا الأحقاد

أحيان أصافحك باليمنا= ويسرى بها سيفي الوقاد

**

فراغ عندي بطول الوقت=ما فيه مخلوق لي يملاه

سنين طعم الهنا ما ذقت=واللي مضى ما قدرت اسلاه

**

لما الشعر والزجل سَلَّم=تزاحمت عندي الأفكار

جعلت بحر الشعر سُلَّم=نظمت جملة من الأبكار

**

يقول المثل : لو حسبنا حساب العصافير ما زرعنا الدخن ، وأناأقول كسرة  :

لو كان نحسب حساب الطير=ما نزرع الزرع بالمره

لا جيت زرعك ضحى وعصير=بالصوت تسمع لها كره

**

شعري نظمته على الوضحى=ويخش بالراس ما يندان

يا رب لي زلتي تمحى=لكن ما ينطفي الوقدان

**

الشعر مالك معه منحى=طار الشعر منك يا حمدان

خذ لك من السوق كم وضحى=مع الحلم عيش والقردان

**

والله هذه الكسرة مجرد خاطرة وليست لشخص معين :

اكشف عن الوجه يا مستور=واعلن عن الإسم بالكامل

لا تكون انثى عليها سْتور=وتغيب لما تجي حامل

**

لا جاب في العام بيضة ديك=يقول انا الشاعر الأكبر

مثل الحصيني حصيله ذيك=الأرنب إلى تجي بالبر

**

الشعر من منبعه راقي=مثل القمر بالسما دوار

وانا الذي عامل أوراقي=صافي كما شعة الأنوار

**

إعصب بدينك وتلقى نصح=من ناس فيه العلاج اشكال

وارقد ببيتك وباكر اصح=والناس تسألك كيف الحال

**

بالخير ربي يعاملني=سبحانه الواحد الوهاب

أخطي وبالعفو شاملني=واقدم على ساحته ما اهاب

**

سبحانه الرازق المعطي=اللي كتب طاعته بكتاب

ما فيه إنسان ما يخطي=لكن من بعد يخطي تاب

**

في دولش الرزق يسعى الخلق=والبعض يسعد ومن يشقى

ما يغلق الرزق بابه غلق=ومهما حرم طالبه يلقى

**

ضربه قويه من امريكان=يا ليتها يا رجال تدوم

يستاهل الخاين اللي كان=للروس خادم ما هو مخدوم

***