كسرات 6 - 6 - 1438هـ

كسرات

لا تطلب الود بالقوه=من شخص عن نهج ودك تاب

بيني وبين البعض هوه=من يوم طلعت لي كتاب

**

أعطيتها الحب واعطتني=كل الذي في الهوى أبغاه

لكنها يوم قطتني=آه الهوى آه ما أطغاه

**

أعلى طموحي غرام الزين=ولما وصلته طمحت اكثر

وصار عندي معاه اثنين=والورد في جانبي يُنثر

**

لك حب في داخلي مكنون=ما حد عرف منزله وافشاه

غير الذي قال كاف ونون=لما خلق حبنا وانشاه

**

جاني الهوى يعتذر من بعد=فارق حياتي مدى معلوم

لما وعدني واخلف وعد=ويقول بعد المدى لا تلوم

**

بين المعازيم محبوبي=فنان كل العرب به قال

وانا مغني بها دوبي=وبآخر الأغنيه موال

**

على جناح الهوى طرنا=حتى وصلنا عنان الجو

نحكي خلاصة مشاعرنا=حديث فيه المحبه تو

**

يوم الوطن في مشاعرنا=غالي ويوم الأمومه دوم

قال الشعر قال شاعرنا=ما للشعر كالأمومه يوم

**

الحب بين البشر واجب=مطلوب مثل الأكل والشرب

وإذا التقى الطرف بالحاجب =بين البشر طاب وقت القرب

**

أسمر خطر قالها المداح=واليوم انا اقولها ثاني

اللي كما البلبل الصداح=لما شدا الصوت واشجاني

**

إن كان لك في الهوى رغبة=اصبر ولا تعيش في الأحزان

اصل الهوى مدته حقبه=وقت الشباب الذي لك زان

**

كان الهوى لي قصير وجار=يمشي معي يوم ما أمشي

ولما شرى وده التجار=ما شاهده في الهوى رمشي

**

سمره ولكنها حلوه=حسب الذي قال واصفها

أنا اشهد ان الهوى بلوه=ورياح تجرف عواصفها

**

يا حب لك عندنا معروف=ما بيننا تجمع العشره

ايام فيها علي تروف=واحنا سوى في الهوى خشره

**

فزعه من الحب يا ربعي=اللي بشره تبلواني

في أول الصيف ربع بي=وفي آخر الصيف شتاني

**

الحب لما يغازلني=أقابله بالغزل مدبول

واليوم عازل وعازلني=ما بيننا بالغرام قبول

**

سافر بي الحب من لندن=حتى نزل بي على باريس

وإن ضاق لي خاطري دندن=حتى كأني معه عَرِّيس

**

قالت الفاغيه بانفحك=يا زين من زهرة غصوني

ومالي غرض فيك لو يذبحك=أما أنا بس يِقْصُوني

**

أروح لكن ما أبعد=عن ساحة الحب مهما كان

حتى ولو فاتني الموعد=ما زلت له ماسك الأركان

**

خلاص يا حب شطبنا=وما عاد بالحب طمعانين

لجل الهوى يوم خاطبنا=بالطف من قبل عشر سنين

**

لو الهوى رجل كنت ارميه=واخلي الحظ في حاله

شوفوا فوئدي معه مدميه=من يوم ما كان ترحاله

**

صورة قديمة من الإرشيف=وابني محمد منزلها

منظر لبعض العرب ما شيف=لعل الأصحاب تقبلها

**

صاحب وغالي من الأصحاب=اللي فقدناه من أيام

حسين روح لذاك الباب=يا رب له بالنعيم لْيام

**

يا حب كسرت مجدافي=والزورق اللي ملكته تاه

كم نمت في حضنك الدافي=ما أعرف الصيف والا شْتاه

**

تزوج الحظ بالصدفه=مولودهم كان كل البخت

اللي حذفني معه حذفه=ودار بي دور حتى دخت

**

يا حب مهما فعلت ونلت=ابقى معك مرتفع خشمي

ولو كنت نشمي مثل ما قلت=أنا معك في الهوى نشمي

**

صباحك الورد والياسْمين=والفل والفاغية والنور

طلتك فيها لنا تطمين=وراحه وفرحة عمر وسرور

**

من مجلس الحب شيلوني=ما عاد ليه معاه حوار

أبغى التقاعد وحيلوني=يمكن أزوره مع الزوار

**

الحب يا ناس ما له حد=يبلى به الشب والشايب

والجاهل اللي سميح الخد=ماني عن مشاهده تايب

**

يا بنت الاجواد شوفيهم=في الحب نشمي ونشميه

يا ما ضربنا المثل فيهم=والكل ميه على ميه

**

شربت انا الحب بالقرطوع=وبالكاس والناس مجتمعه

واليوم صار الهوى مقطوع=ما هل لي لو كما الدمعه

**

يا حب يا مدوخ العربان=حتى الخواجات دوخهم

شيبان والا من الشبان=مثل البعارين نوخهم

**

البرد ضارب علينا حصار=حسب المدى في مراصدنا

يارب نصبر على ما صار=لو كان له ما تعودنا

**

كل ما تخارجت من صكات=يبلاني الوقت من ثاني

يا رب تجعل لي الفكات=من وقتي اللي تبلواني

**

من عهد ماضي لنا باقي=ذكرى تعيد الزمان الزين

ما كان قلبي بها شاقي=ولا كان تشقى بها العينين

***