كسرات 19 / 6 / 1438هـ

كسرات

خذ من عيون المها نبراس=وامشي على الدرب متعدي

لا ينكس الحب منَّك راس=وتقول للناس من قدي

**

سألت راعي هوى سابق=عن الهوى فيه وش عينت

قلي جرى الدمع متسابق=وجروح بالقلب ما ونيت

**

يا اللي تعصر ببيضة ديك=ويعدها الناس من بره

تبغى سواها ولا يمديك=والناس تقطع لك الجُره

**

عاشرت من بعد خلي خل=لكن ما طابت العشره

ذاك الذي عشرته من فل=عكس الذي عشرته قشره

**

ولع فتيل المحبه في=وراح عني وخلاني

من شاف لي حل واستشفي=من نار بالقلب تصلاني

**

العين شافت بنظرتها=والقلب لما تباكت حس

سالت على الخد عبرتها =ما حس بيه وقلي بس

**

أسأل عن اللي هرب مني=ولا قِدْر يرجع عليه يوم

ياكم مره سأل عني=واليوم يمنع سؤاله دوم

**

قضيت انا العمر مستني=حبيبي اللي عليه راح

سود الليالي ما نسني=هن عقبن لي أسى وجراح

**

أقولها مثل ضرب السوط=هي الحقيقة على لساني

كسبت أنا في المحبه شوط=وخسرت في شوطها الثاني

**

الحب تنين صلف أقشر=عقاربه جنب حَيَّاته

كم عامل المبتلى بالشر=عنتر غدا من ضحياته

**

أقول تفصيل مع موجز=أحبكم يا جماهيري

وافخر بأمثالكم واعتز=وانثر عليكم أزاهيري

**

يا خافقي كل ما تأمل=يأتيك عكس الذي ترجيه

تعمل وتبحث عن الأجمل=والوقت يأتي بسبع وجيه

**

خلك مجاهد مع الأكوان=يا تكون قاتل ويا مقتول

لو كنت ما تعرف الألوان=ما دام مشي الزمن مفتول

**

يا كم أعلنت عن ضيقي=لكن غني دوم باخلاقي

ما يحبس الفقر لي ريقي=أو يحني الراس إملاقي

**

قلي حبيبي ما عندك وصف=ليَّه ويوصف جمالاتي

رصفت كل المعاني رصف=وعجزت في كل حالاتي

**

سف التراب الذي بالأرض=أخف من مطلب الحاجه

لو كان سلفه ودين وقرض =لا صار للشخص بمواجه

**

نظرة وشافت بها صدري=ياليتها تعلم اللي فيه

حبيتها حب من بدري=لكن عنها الهوى مخفيه

**

أعرف قلوب الرجال رقاق=لو كان تظهر قساوتها

كلمة غزل والرجل ينساق=لو كان بالمر ساوتها

**

أفلام هندي أشاهدها=فيها المرح والحلا والذوق

يضغط بيده علي يدها=تعبير عن حبها والشوق

**

محضر بناتي وأولادي=ليله على الخير تجمعنا

إبليس عن ذاك في وادي=ولا فيه عذال تسمعنا

**

يا مسك يا فل يا كادي=يا اللي الهوى فيك وقعنا

يا ريم يا ظبية الوادي=ليت الهوى فيك يجمعنا

**

في عينها شفت كل الخوف=ظنت بأني أعاني شي

يكفيك مني النظر والشوف=يا اللي لقلبي وعيني ضي

**

اليوم صار العشا جبنه=مع الحلاوه وطيب الفال

ما كان لي قرش بالخبنه=حتى أدبر عشا الأطفال

**

من كهربه خمس مية وات=عيون بالنور شعت لي

غديت منها كما الأموات=حرام يا عين في قتلي

**

اطلع شويه وأنزل تحت=واراعي الباب باعياني

ما فيه لحظه وفيها ارتحت=من يوم فارقت بالعاني

**

في كل جمعه لنا جلسه=جلسه لطيفه مع الأحباب

تمضي أحاديثنا سلسه=لا ننم فيها ولا نغتاب

**

لما تحديت صادتني=بعيون فيها السحر معقود

ولما تعديت نادتني=واصبحت في حبها موعود

**

إعلان للمره الميه=أدرَى الصداقه واقدرها

وبأرض بحماه محميه=رجلي قسم ما أدودرها

**

فوق الذي فيه تتصور=أحبها حب ماله حد

القلب لا شافها نور=من عينها أو شعاع الخد

**

تناثر الدمع من عيني=لما رأيت الحبيب يصد

الله يجارني الذي بيني=وبينه سعى بالهزل والجد

**

قمري شذا شاقني بالصوت=واستأنس القلب بانشاده

لما رماني حبيبي أوت=بعد الغرام الذي شاده

**

جمعه تجي بعدها جمعه=والوقت يمضي على منوال

أحيان يعصر لنا الدمعه=وأحيان تحسن لنا الأحوال

**

يا حب فجر براكينك=واحرق قلوب الأوادم حرق

واحنا إلى الرب شاكينك=دعوه علت للسما كالبرق

**

آخر صلاتي ودعواتي=أدعي بها في ظلام الليل

لا جف دمعي بمراوتي=وارعى الجدي مع طلوع سهيل

**

يا وردهم نصبوك أمير=وقايد لكل الزهور اصبحت

وبجوقة العزف والتزمير =زفوك لما بعطرك فحت

**

شفت الهوى رايح المسجد=وقلت يا ربنا التوبه

ما ادري عزى توبته من جد=والا الرجل توبته نوبه

**

يا حب ما احلى زياراتك=لا جيت فيها السعد والقرب

وباسيف في الناس غاراتك=لا جيت تعلن عليهم حرب

**

يا زيد لك ذكريات كثار=أيام قلب البشر خالي

لما غبارك عُصَير يثار=ذكرى وما تغيب عن بالي

**

يالله يا رب سلحني=بايمانك اللي عليَّه أمْر

يصلح حياتي ويصلحني=ما عاد باقي بوقتي عمر

**

لا تطلب الود بالقوة=من شخص عن نهج ودك تاب

بيني وبين البعض هوه=من يوم طلعت لي كتاب

**

بيني وبينك فضا ممدود=وبحور باعماقها حاجز

والبر ما بيننا مسدود=باوصلك لكن أنا عاجز

**

حبايبي يا محبيني=اللي اصبحوا خارجين البيت

قدام كانت تلبيني=وان كان نادت أنا لبيت

**

الحب لهل الهوى حاكم=ما يحكمونه بفرد وجمع

لا حل والجو متراكم=مثل السحابه يهل الدمع

**

لا يا طيور السما طيري=روحي على ديرة المحبوب

في جو يحمل أعاطيري=من قلب زهره شذاه يذوب

**

يا حب خذ لك عَهَد ولزام=لو جبت لي بس مطلوبي

واعمل معك في الخبيتي زام=وتجيب لي اليوم محبوبي

**

على لحون القماري سرب=والشعر تشعل قناديله

قلت القوافي لبعضها ترب=والشعر تكثر رجاجيله

**

في الواسطة كان يا ما كان=ابن نقيمش وعرجاني

أما بدر ماسك الأركان=داود جنب الزليباني

**

إسرح بقطعة حلالك واضو=يظلملك الليل والا ضاء

واذا اشتكى عند مسلم عضو=له تشتكي ساير الأعضاء

**

يقولها صدق ابو خالد=بالصبح من قبل يصحى الطير

يا حرب مبروك للوالد=والمسلمين امرهم في خير